छत्रपती शिवाजी महाराज टर्मिनस येथील मेल, एक्स्प्रेस प्रवाशांची वाढती संख्या लक्षात घेता मध्य रेल्वेवरील काही प्लॅटफॉर्मच्या लांबीमध्येही वाढ केली जात आहे. लांब पल्ल्याच्या मार्गांवरील काही प्लॅटफॉर्मची लांबी वाढवून तिथे २४ डब्यांच्या गाड्या थांबतील अशी रचना केली जाणार आहे. या योजनेसाठी ६१ कोटी रुपयांचा खर्च येणार आहे.
सीएसएमटी येथे काही प्लॅटफॉर्मवर २४ डब्यांच्या गाड्या थांबण्याची व्यवस्था आहे. पण, काही प्लॅटफॉर्मची लांबी कमी असल्याने त्या ठिकाणी मेल, एक्स्प्रेसना थांबे देण्यात अडचणी येतात. २४ डब्यांच्या अन्य गाड्याही या प्लॅटफॉर्मवर थांबणे कठीण ठरते. ही अडचण दूर करण्यासाठीच मध्य रेल्वेने प्लॅटफॉर्मची लांबी वाढवण्याची योजना आखली आहे.
सीएसएमटी येथे १ ते १८ क्रमांकांच्या प्लॅटफॉर्मपैकी सात प्लॅटफॉर्म लोकल सेवेसाठी आहेत. त्यापुढील आठ ते १८ क्रमांकांचे प्लॅटफॉर्म मेल, एक्स्प्रेस सेवेसाठी उपयोगी येतात. त्यातील १३ ते १८ क्रमांकांच्या प्लॅटफॉर्मची क्षमता २४ डब्यांच्या गाड्यांची आहे. त्यामुळे या प्लॅटफॉर्मवर २४ डब्यांच्या गाड्यांची नेहमी वर्दळ असते. या संपूर्ण क्रमवारीत ८ आणि ९ क्रमांकांच्या प्लॅटफॉर्मची उंची वाढवण्यात जागेची कमतरता भासत आहे.
सीएसएमटी येथील ९ आणि १० क्रमाकांचे प्लॅटफॉर्म ११ आणि १२ डब्यांच्या क्षमतेचे असून, ११ आणि १२ क्रमांकांच्या प्लॅटफॉर्मची क्षमता १७ डब्यांपर्यंतची आहे. या साऱ्याचा आढावा घेत मध्य रेल्वेच्या सीएसएमटी येथील मुख्यालयातील इंजिनीअरिंग विभागाने प्लॅटफॉर्म लांबीसाठी योजना आखली आहे. त्या अनुषंगाने ९ ते १२ पर्यंतच्या प्लॅटफॉर्मची लांबी वाढवण्याचे काम हाती घेण्यात आले आहे. हे काम पूर्ण झाल्यावर तिथे इंटरसिटीप्रमाणेच अन्य काही गाड्यांच्या डब्यांमध्ये वाढ करणे शक्य होणार आहे. त्याचप्रमाणे गर्दीच्या वेळेस प्रवाशांच्या प्रतीक्षा यादीचा अंदाज घेऊन त्या प्रमाणात डब्यांची जोड देता येईल, असे मध्य रेल्वेचे जनसंपर्क अधिकारी ए. के. सिंह यांनी सांगितले.