सिन्नर येथील संजय क्षत्रिय या गणपतीवेड्या कलाकाराने या वर्षीही आइस्क्रीमच्या ५ हजार ५०० काड्यांचे ७ फूट बाय १० फूट उंचीचे गणेश मंदिर तयार केले आहे. हे मंदिर तयार करण्यासाठी चार महिने अवधी लागला असून, रोज सहा ते सात तास काम करीत ते पूर्ण केले आहे. या मंदिराच्या कामासाठी पाच किलो फेविकॉल लागले आहे.
मुख्य मंदिराला पाच इंच आकाराचे गोलाकार खांब आहेत व दुसऱ्या दोन मंदिरांना ४ इंच आकाराचे चौरस खांब आहेत. या मंदिराचा घुमट अतिशय सुरेख असा तयार करण्यात आला असून, त्यावर षटकोन, चौकोन, गोल, चांदणी अशा प्रकारच्या आकारांची कलाकुसर करण्यात आली आहे. घुमट तयार करताना सात तासांत केवळ १ इंच काम होत असे. हे मंदिर पूर्णपणे ७४ पार्टमध्ये विभागले गेले आहे. याची महिरप व झुंबर आइस्क्रीमच्या काड्यांपासूनच तयार केली आहे. मंदिराला चारही बाजूंनी कोट तयार केला आहे. मंदिराला नऊ पायऱ्या आहेत. तीन मोठे घुमट व १५ कळस आहेत. हे मंदिर पूर्णपणे काड्यांवर उभे केले असून, पर्यावरणाला हानी पोहोचेल अशा एकाही वस्तूचा वापर केलेला नाही. आइस्क्रीम काड्यांची दोन फूट गणेश मूर्ती चार दिवसांत तयार करण्यात आली आहे.
संजय क्षत्रिय यांनी २१ वर्षांत पाव इंच ते तीन इंचापर्यंत शाडू माती व डिंकापासून सुमारे ३० हजार गणेशमूर्ती हाताने तयार केल्या आहेत. नाचणारे, वाद्य वाजवणारे, फेटेवाले, पुस्तक वाचतानाचे असे गणपती तयार केले आहेत. ८१ गणपतीची दहीहंडी अशा विविध गणपतीच्या मूर्ती त्यांच्या संग्रही आहेत. या सर्व कलाकृतींना त्यांची पत्नी वंदना व मुलगी पूजा व अक्षदा यांचे सहकार्य मिळाल्याचे ते सांगतात.
काड्यांपासून गणपतीही
४ बाय ४ इंच आकाराच्या बॉक्समध्ये श्री गणेशाच्या ७२ मूर्ती चिकटविण्यात आल्या आहेत. तसेच एका बॉक्समध्ये ५१ गणपती ठेवण्यात आले आहेत. आइसक्रीम काड्यांचा वापर करून दोन फुटांचा गणपती तयार केला आहे. त्याच काड्यांपासून खुर्ची तयार केली आहे. हे मंदिर १४ ते १९ सप्टेंबरपर्यंत सायंकाळी पाच ते रात्री अकरा वाजेपर्यंत सर्वांना पाहण्यासाठी खुले राहणार आहे. मंदिरासाठी राजेंद्र पगार यांच्याकडून आइस्क्रीम काड्या पुरविण्यात आल्या आहेत.