पाकिस्तानचे माजी पंतप्रधान नवाझ शरीफ यांच्या पत्नी कुलसुम यांचे मंगळवारी निधन झालं. त्या ६८ वर्षाच्या होत्या. कुलसुम यांचं निधन झाल्याने नवाझ शरीफ, त्यांची कन्या मरियम आणि जावई मुहम्मद सफदर यांना १२ तासाची पॅरोल मंजूर करण्यात आली आहे. त्यामुळे शरीफ यांना पत्नीच्या दफनविधीत सहभागी होता येणार आहे.
कुलसुम शरीफ या गेल्या काही काळापासून त्या घशाच्या कर्करोगाने आजारी होत्या आणि लंडनमध्ये त्यांच्यावर उपचार सुरू होते. मंगळवारी पहाटे त्यांची प्रकृती ढासळल्याने त्यांना जीवरक्षक प्रणालीवर ठेवण्यात आले होते. परंतु, उपचाराला प्रतिसाद न दिल्याने त्यांची प्राणज्योत मालवली, अशी माहिती शरीफ यांचे बंधू शाहबाझ यांनी दिली. दरम्यान, पाकिस्तानच्या तुरुंगात भ्रष्टाचाराच्या आरोपाखाली असलेले नवाझ शरीफ, त्यांची कन्या मरियम आणि जावई मुहम्मद सफदर यांना १२ तासांच्या पॅरोलवर तुरुंगातून सोडण्यात आले आहे. भारताच्या परराष्ट्रमंत्री सुषमा स्वराज यांनी कुलसुम शरीफ यांच्या निधनाबद्दल शोकव्यक्त केला आहे.