बसच्या गर्दीत प्रवास करीत असाल तर काळजी घ्या. गर्दीमध्ये तुमची बॅग किंवा पर्स कधीही कापली जाऊ शकते. गर्दीत बॅगामधून रोकड आणि किंमती वस्तू चोरणाऱ्या दोन टोळ्यांचा ताडदेव पोलिसांनी पर्दाफाश केला. पोलिसांनी सहाजणांना नुकतीच अटक केली असून त्यांच्याकडून रोकड तसेच दागिने जप्त केले. या सहजणांनी मुंबईत अनेक ठिकाणी गुन्हे केल्याची शक्यता आहे.
कल्याणहून एक महिला १५ ऑगस्टला मुलांना घेऊन हाजीअली आणि महालक्ष्मी येथे दर्शन घेण्यासाठी आली होती. दादरवरून हाजीअलीसाठी बसने प्रवास करीत असताना गर्दीमध्ये तिची बॅग कापण्यात आली. बॅगेतील पैसे आणि मंगळसूत्र असा सुमारे वीस हजारांचा ऐवज घेऊन ते पसार झाले. या महिलेने याबाबत ताडदेव पोलिस ठाण्यात तक्रार केली. यानंतर तीन दिवसांनी एक वृद्ध इसम बसमधून प्रवास करीत असताना एसी मार्केटजवळ त्यांच्या हातातील बॅगेतून पाच लाखाची रोकड पळविण्यात आली. ही घटना १८ ऑगस्ट रोजी घडल्यानंतर त्या व्यक्तीच्या तक्रारीवरून ताडदेव पोलिसांनी गुन्हा दाखल केला.
बसमधील प्रवाशांच्या बॅगा कापून ऐवज पळविण्याच्या घटना वाढत असल्याने याची गंभीर दखल घेत वरिष्ठ पोलिस निरीक्षक संजय सुर्वे यांच्या मार्गदर्शनाखाली निरीक्षक उमेश कदम, सहायक निरीक्षक अरुण थोरात, उपनिरीक्षक पडवाळे यांच्यासह गुन्हे प्रकटीकरण कक्षाने या गुन्ह्याचा तपास सुरू केला. सीसीटीव्ही फुटेज, तांत्रिक पुरावे आणि खबरींकडून मिळालेल्या माहितीच्या आधारे अशा प्रकारे चोऱ्या करणाऱ्या टोळ्या धारावी आणि माहीम परिसरात राहत असल्याची माहिती मिळाली. वेगवेगळ्या भागात सापळा रचून पोलिसांनी संजय त्रिंबक, नसीम खान, सुनील चौहान, हैदर अली झैदी, फिरोझ हमजा खान आणि रझाक शेख या सहाजणांना अटक केली. हे सहाजण वेगवेगळ्या टोळीचे सदस्य आहेत. या टोळीतील काहीजण अद्यापही फरार असलचे पोलिसांनी म्हटले आहे.
मीटिंगनंतर मोहीम
धारावी आणि माहीम येथील नाक्यावर दररोज सकाळी हे तरुण जमा होतात. बेस्ट बसच्या कोणत्या मार्गावर आणि कधी गर्दी होते याची काढलेली माहिती सर्वांना दिली जाते. त्यानुसार वेगवेगळे मार्ग निवडले जातात. दिवसभरात एक-दोन ठिकाणी हातसफाई केल्यानंतर रात्री पुन्हा एकमेकांना भेटतात.
असे हेरतात सावज
गर्दीच्या मार्गावरील बस थांब्यावर टार्गेट हेरले जाते.
महिला किंवा वृद्ध या चोरांचे प्रमुख लक्ष्य
खाणाखुणा करून एका व्यक्तीवर एकमत होते.
ती व्यक्ती बसमध्ये चढताना तिला चारही बाजूने घेरतात.
गर्दीत त्या व्यक्तीला कोंडीत पकडतात.
एक जण कटर किंवा ब्लेडने बॅग कापतो आणि पैसे काढतो.
इतर साथीदार त्या व्यक्तीला बोलण्यात गुंतवितात.
चोर दुसऱ्याच दिशेला गेल्याचे भासवून दिशाभूल करतात.