वरिष्ठ महाविद्यालयातील सहायक प्राध्यापक पदासाठी विद्यापीठ अनुदान आयोगामार्फत घेतली जाणारी राष्ट्रीय पात्रता परीक्षा अर्थात नेट ही परीक्षा आता ऑनलाइन स्वरूपात घेतली जाणार आहे. आतापर्यंत केंद्रीय माध्यमिक शिक्षण मंडळातर्फे अर्थात ‘सीबीएससी’तर्फे घेतली जाणारी ही स्पर्धा आता नॅशनल टेस्टिंग एजन्सीमार्फत (एनटीए) घेतली जाणार आहे.
नॅशनल टेस्टिंग एजन्सी ही मनुष्यबळ विकास मंत्रालयाची स्वायत्त संस्था आहे. या संस्थेमार्फत असिस्टंट प्रोफेसर किंवा ज्युनिअर रिसर्च फेलोशिप या दोन्ही पदांसाठी नेट परीक्षा घेण्यात येणार आहे. या परीक्षेसाठी अर्ज भरण्याची मुदत सुरू झाली असून अर्ज करण्याची अंतिम मुदत ३० सप्टेंबरपर्यंत आहे. नऊ ते २३ डिसेंबर दरम्यान ही कम्प्युटर बेस्ड ऑनलाइन परीक्षा घेण्यात येईल, स्पष्ट केले गेले आहे.
विद्यापीठ अनुदान आयोगातर्फे नेट परीक्षेच्या स्वरूपात काही महिन्यांपूर्वी बदल करण्यात आला होता. त्यानुसार ३५० गुणांसाठीच्या तीन पेपरचे रूपांतर दोन पेपरमध्ये करण्यात आले होते. त्यानुसार पहिला पेपर १०० गुणांचा, तर दुसरा पेपर २०० गुणांचा असेल. आतापर्यंत ही परीक्षा एकाच दिवशी घेण्यात येत होती. आता, मात्र परीक्षेच्या स्वरूपात आमूलाग्र बदल करण्यात आला असून पहिल्यांदाच ही परीक्षा पंधरा दिवसांत दोन सत्रांमध्ये घेण्यात येईल. दोन सत्रांमध्ये होणाऱ्या या परीक्षेत सकाळच्या सत्रात सकाळी साडेनऊ ते साडेदहा या वेळेत १०० गुणांचा पहिला पेपर तर सकाळी अकरा ते दुपारी एक या वेळेत २०० गुणांचा दुसरा पेपर घेण्यात येईल. दुपारच्या सत्रात दुपारी दोन ते तीन पहिला पेपर व साडेतीन ते साडेपाच या वेळेत दुसरा पेपर घेतला जाईल. या परीक्षेसाठी खुल्या प्रवर्गासाठी ८०० रुपये, ओबीसी प्रवर्गासाठी ४०० रुपये, एससी एसटी प्रवर्गासाठी २०० रुपये शुल्क आकारण्यात येईल, या संदर्भातील अधिक माहितीसाठी ‘नॅशनल टेस्टिंग एजन्सी’च्या वेबसाइटवर उपलब्ध आहे.