वायूदलाच्या ‘मिग २७’ या लढाऊ विमानाला राजस्थानमधील जोधपूरमध्ये अपघात झाला. आज सकाळी ही दुर्दैवी घटना घडली असून या अपघातात लढाऊ विमान जळून खाक झाले आहे. घटनास्थळी पोलीस आणि अग्निशमन दलाच्या गाड्या पोहोचल्या आहेत.
वायुदलाचे ‘मिग २७’ हे लढाऊ विमान नियमित मिशनवर होते. जोधपूरच्या देवलिया गावाजवळ हे विमान क्रॅश झाले. यावेळी स्फोट झाल्याने मोठा आवाज झाला. या स्फोटात हे विमान जळून खाक झाले. सुदैवाने या अपघातात कोणतीही जीवितहानी झाली नाही. या विमानातील पायलट सुरक्षित असल्याची माहिती आहे. विमान अपघातानंतर वायूदलाने अपघाताचा तपास करण्याचे आदेश दिले आहेत. गेल्या काही दिवसापासून मिग विमानांना अपघात होण्याचे प्रमाण वाढले आहे. काही दिवसापूर्वी हिमाचल प्रदेशमधील कांगडा जिल्ह्यात ‘मिग २१’ या लढावू विमानाला अपघात झाला होता व त्यात पायलटचा मृत्यू झाला होता.