पावसाने विश्रांती घेतल्यानंतर मुंबईमध्ये साथीच्या आजारांचे प्रमाण काहीसे कमी झाले आहे. मात्र, ऑगस्ट महिन्यात साथीच्या आजारांनी सात जणांचा मृत्यू झाल्याची माहिती पालिकेच्या आरोग्य विभागाकडून देण्यात आली आहे. त्यात डेंग्यू व लेप्टोचे प्रत्येकी तीन मृत्यू असून, मलेरियामुळे सहा ऑगस्ट रोजी तीन वर्षांची मुलगी दगावली आहे. या महिन्यात मुंबईत एकूण ८०४ रुग्णांची नोंद झाली. गेल्यावर्षी याच महिन्यात हे प्रमाण ९०० रुग्णांपेक्षा अधिक होते.
ऑगस्ट महिन्याच्या पंधरावड्यात लेप्टोमुळे दोघांचा मृत्यू झाला असून, त्यांच्यात ५० आणि २५ वर्षीय व्यक्तींचा समावेश आहे. शिवाय, जुलै महिन्यात कुर्ला येथील ३२ वर्षीय महिलेचा डेंग्यूने मृत्यू झाल्याची नोंद करण्यात आली आहे. हे रुग्ण मुंबईतील नसून ते उत्तर प्रदेशमधून आले असल्याची माहिती पालिकेच्या आरोग्य विभागाने दिली आहे.
डेंग्यू आणि मलेरियाचा प्रादुर्भाव टाळण्यासाठी बहुतांश ठिकाणी धूरफवारणी सुरू असल्याची माहितीही पालिकेच्या आरोग्य विभागाकडून देण्यात आली. डेंग्यूच्या प्रतिबंधासाठी घरातील पाण्याचे साठे झाकणाने बंद ठेवा. घरातील पाणी सात दिवसांनी बदला, असे आवाहन पालिकेच्या वतीने करण्यात आले आहे.
गॅस्ट्रोचे ६४५ रुग्ण
१६ ते ३१ ऑगस्ट या कालावधीत गॅस्ट्रोच्या २६९ रुग्णांची नोंद करण्यात आली असून, १ ते १५ या कालावधीत असे ३७६ रुग्ण आढळले होते. म्हणजे ऑगस्ट महिन्यात एकूण ६४५ गॅस्ट्रोचे रुग्ण आढळले आहेत. लेप्टोचे ४६ रुग्ण आढळले असून, डेंग्यूचे १५३ रुग्ण आढळले आहेत. मुंबईत डेंग्युसदृश्य तापासाठी ११३४ रुग्णांवर पालिकेच्या विविध रुग्णालयात उपचार सुरू आहेत. पालिकेने ११६९ घरांचे सर्वेक्षण केले असून, ज्या रुग्णांना डेंग्यू असल्याचे निदान झाले आहे, त्यांच्यावर तातडीने उपचार सुरू करण्यात आले आहेत. लेप्टोसदृश्य लक्षणांचे तीन रुग्ण सापडले असून त्यांच्यावरही औषधोपचार सुरू करण्यात आले आहेत.