उल्हासनगर: येथील कॅम्प क्रमांक दोन परिसरात सार्वजनिक ठिकाणी एक तरुण लघुशंका करत असता, त्याला चंद्रकांत मोरे या तरुणाने याबाबत जाब विचारला असता, त्याचा राग येऊन मोरे याची पोटात चाकू मारून हत्या केल्याची धक्कादायक घटना समोर आली आहे. याप्रकरणी पोलिसांनी तीनपैकी एका आरोपीला अटक केली असून उर्वरित दोन आरोपींचा पोलिस शोध घेत आहेत.
कॅम्प नंबर दोन परिसरात चंद्रकांत मोरे (२१) हा तरुण राहतो. दोन दिवसांपूर्वी तो आपल्या मित्रांसोबत मच्छी मार्केट परिसरात चायनीज खाण्यासाठी गेला होता. यावेळी या ठिकाणी आलेल्या तिघा तरुणांपैकी नितीन चौधरी हा तरुण सार्वजनिक ठिकाणी लघुशंका करत होता. याबाबत चंद्रकांत मोरे याने नितीन याला हटकले. या गोष्टीचा राग आल्याने, चंद्रकांतसोबत नितीन आणि त्याच्या इतर दोन मित्रांचा चंद्रकांतसोबत वाद झाला. या वादानंतर तो राग मनात धरून, चंद्रकांत सायंकाळी एसईएस शाळेच्या परिसरातून जात असताना नितीन चौधरी, सुनील प्रजापती आणि रवि जैस्वाल या तिघांनी त्याला अडवले. सुनील प्रजापती याने चंद्रकांतच्या पोटात चाकूने वार केला. या घटनेत चंद्रकांत गंभीररीत्या जखमी झाला. चंद्रकांतवर वार करून हे तिघे पळून गेले. जखमी चंद्रकांत याला उपचारासाठी सेन्ट्रल हॉस्पिटलमध्ये दाखल करण्यात आले. त्याची प्रकृती चिंताजनक असल्याने, त्याला पुढील उपचारासाठी कळवा येथील एका खासगी हॉस्पिटलमध्ये दाखल करण्यात आले. या ठिकाणी उपचार सुरू असतानाच त्याचा मृत्यू झाला. याप्रकरणी उल्हासनगर पोलिस स्टेशनमध्ये गुन्हा दाखल करण्यात आला होता. पोलिसांनी अवघ्या काही तासांत या घटनेतील आरोपी रवि जैस्वाल याला हनुमान नगर परिसरातून अटक केली. तसेच या घटनेतील मुख्य आरोपी सुनील प्रजापती आणि नितीन चौधरी यांचा पोलिस शोध घेत आहेत.