ड्रगच्या आहारी गेलेल्या एका विकृत पतीनं मित्रासोबत पत्नीवर बलात्कार केला. हा विकृत इतक्यावरच थांबला नाही तर त्यानं या सर्व प्रकाराचं चित्रीकरण केलं व ते सोशल मीडियावर व्हायरल करण्याची धमकी दिली. पीडित महिलेच्या तक्रारीवरून पोलिसांनी गुन्हा दाखल केला आहे. दोन्ही आरोपी फरार झाले असून पोलीस त्यांचा शोध घेत आहेत.
कल्याण पूर्वेकडील कोळसेवाडी या ठिकाणी १७ ऑगस्ट रोजी ही घटना उघडकीस आली. ड्रगच्या आहारी गेलेल्या पतीने पीडित महिलेला शीतपेयातून उत्तेजना वाढवणारं द्रव्य पाजलं. त्यानंतर पत्नीला मित्रासोबत शारीरिक संबंध ठेवण्यासाठी दमदाटी केली. महिलेने हे सर्व करण्यास विरोध करताच तुझा व्हिडिओ काढून तो सोशल मीडियावर व्हायरल करू, तसेच तुझ्या भावाचे हात-पाय तोडू, अशी धमकी दिली. या सर्व प्रकारामुळे भयभीत झालेल्या पीडित महिलेने पती आणि त्याच्या मित्राचे लैंगिक अत्याचार सहन केले. दोन्ही आरोपींनी तिच्यावर लैंगिक अत्याचार केल्यानंतर त्याचे व्हिडिओ चित्रीकरण केले. हे पती-पत्नी वेगवेगळे राहत होते.
रविवारी, रक्षाबंधनासाठी माहेरी आलेल्या पीडित महिलेनी तिच्यावर घडलेला सर्व प्रसंग तिच्या बहिणीला सांगितला. तिच्या बहिणीच्या मदतीनं तिनं कोळसेवाडी पोलीस ठाण्यात पती आणि त्याचा मित्रांविरोधात गुन्हा दाखल केला. दरम्यान, गुन्हा दाखल होताच दोन्ही आरोपी फरार झाले असून पोलीस त्यांचा शोध घेत आहेत.