लहान मुलं खेळता खेळता वस्तू गिळणं किंवा कानात-नाकात वस्तू घालणं असे उद्योग करतच असतात. त्यातून अनेकदा अपघात घडतात आणि मग पालकांची पळापळ होते. अशीच धक्कादायक घटना एका नेपाळी मुलाच्या बाबतीत घडली आहे. डोळ्यावाटे नाकात गेलेली एक काठी घेऊन या मुलाला तब्बल सहा वर्षे काढावी लागली आहेत. सहा वर्षांनंतर अखेर ही काठी बाहेर काढण्यात डॉक्टरांना यश आलं आहे.
पुण्यातील ससून रुग्णालयात ही अत्यंत कठीण शस्त्रक्रिया पार पडली. सूरज सवंत असं या मुलाचं नाव असून तो १५ वर्षांचा आहे. मूळचा नेपाळचा रहिवासी असलेला सूरज ६ वर्षांपूर्वी झाडावरून खाली पडला होता. त्यावेळी एक काठी त्याच्या डोळ्याला लागली. ती काठी डोळ्यातून थेट त्याच्या नाकात गेली. हा अपघात घडल्यानंतर सूरजच्या आई-वडिलांनी लगेचच डॉक्टरकडे धाव घेतली. पण स्थानिक डॉक्टरांनी त्याच्यावर उपचार करण्यास नकार दिला. अखेर सूरजच्या नातेवाईकांनी त्याला पुण्याच्या ससून रूग्णालयात दाखल केलं.
ससूनच्या डॉक्टरांनी सूरजचं सिटी स्कॅन केलं. तेव्हा ८ सेंमीचा काठीचा तुकडा त्याच्या नाक आणि मणक्याच्या मध्ये अडकल्याच लक्षात आलं. एन्डोस्कोपी शस्त्रक्रिया करून डॉक्टरांना काठीचा अडकलेला जितका भाग काढणं शक्य होतं, तितका भाग काढला. शरीरात अडकलेली एखादी वस्तू इतक्या वर्षानंतर काढल्याची ही पहिलीच घटना आहे.
‘सूरजच्या नाकात अडकलेली काठी काढण्यासाठी आम्ही तब्बल अर्धा तास प्रयत्न करत होतो, मात्र ती काढणं खूप कठीण होतं. ही शस्त्रक्रिया खूप जोखमीची होती. शस्त्रक्रिया करताना मणका तुटला असता, तर त्याला पॅरालिसिस झाला असता असं ससून रुग्णालयाचे डॉ. समीर जोशी यांनी एका न्यूज वेबसाइटशी बोलताना सांगितलं.