पहिले लग्न झालेले असूनही आणखी एक लग्न केले. मात्र, दुसऱ्या पत्नीचे अपहरण करत तिला अचानक गायब केल्याच्या आरोपाखाली ठाणे मध्यवर्ती कारागृहातील हवालदाराला मुंब्रा पोलिसांनी अटक केली आहे. हवालदाराला ठाणे न्यायालयाने १४ ऑगस्टपर्यंत पोलिस कोठडी दिली आहे. वर्षभरापासून बेपत्ता असलेल्या या महिलेचा पोलिस शोध घेत आहेत.
अरुण निवृत्ती शेलार (४७ रा. काटेमानेवली, कल्याण पूर्व) असे या हवालदाराचे नाव आहे. दिव्यात राहणाऱ्या ३३ वर्षीय महिलेची अरुणबरोबर ठाणे कारागृहात दोन वर्षांपूर्वी ओळख झाली होती. ओळखीचे रूपांतर प्रेमात झाले. आरोपी या महिलेला भेटण्यासाठी दिव्यात येत होता. नंतर अरुणने महिलेकडे लग्नाचा प्रस्ताव ठेवला. या प्रस्तावाला महिलेने होकार दिल्यांनतर २०१७मध्ये मे महिन्यात ठाण्यातच दोघांचा विवाहही झाला. मात्र विवाहानंतर ही महिला दिव्यातच राहत होती. ही महिला गरोदर असताना जुलै महिन्यात सकाळी अरुण आणि त्याची पत्नी वज्रेश्वरीला फिरण्यासाठी गेली होती. मात्र आठवड्यानंतरही ही महिला घरी न आल्याने तिचे माहेरचे चिंतेत पडले. याबाबत अरुणकडे विचारणाही केली. मात्र त्याने काहीच न सांगितल्याने अखेर ही महिला हरवल्याबाबत माहेरच्यांनी मुंब्रा पोलिस ठाण्यात तक्रार केली होती. पोलिसांनी या महिलेचा शोधही घेतला. मात्र ही महिला सापडली नाही. महिलेच्या घरच्यांनी अरुणबाबत अधिक चौकशी केली असता, त्याचे पहिले लग्न झाले होते. पहिल्या पत्नीशी घटस्फोट न घेता दुसरे लग्न केले होते. तसेच पहिल्या पत्नीसोबत कल्याणमध्ये राहत असल्याची माहिती पुढे आली. त्यामुळे दुसऱ्या पत्नीच्या भावाने मुंब्रा पोलिस ठाण्यात अरुणविरुद्ध तक्रार दिली.
पहिले लग्न लपवून ठेवत दुसरे लग्न करून फसवणूक केल्याचा आरोप अरुणवर आहे. तसेच मागील वर्षभरापासून दुसरी पत्नी बेपत्ता असून पाच महिन्यांची गरोदर असताना तिने गर्भपात करण्याबाबत अरुणने पत्नीवर दबावही टाकल्याचा आरोप करण्यात आला आहे. गर्भपातास नकार दिल्याने फिरण्याचा बहाणा करून तिच्या जिवाचे बरेवाईट करण्याच्या उद्देशाने तसेच तिचा गर्भपात करण्याच्या हेतून तिचे अपहरण करत करत अज्ञात ठिकाणी लपवून ठेवले असल्याचेही आरोप महिलेच्या भावाने केला आहे. गुन्हा दाखल होताच मुंब्रा पोलिसांनी तत्काळ आरोपीला अटकही केली आहे. मात्र ही महिला गेली कोठे, हा मोठा प्रश्न निर्माण झाला आहे. महिलेचा शोध सुरू असल्याचे पोलिस अधिकाऱ्यांचे म्हणणे आहे.