मराठा आरक्षणाच्या मागणीसाठी सकल मराठा समाजाने गुरुवारी महाराष्ट्र बंदची हाक दिली आहे. या बंदच्या पार्श्वभूमीवर, खबरदारीचा उपाय म्हणून मुंबईतील अनेक शाळांनी सुट्टी जाहीर केली आहे. दरम्यान, या बंदातून मुंबईला वगळण्यात आले असले, तरी मुख्याध्यापकांनी सावध पवित्रा घेत शाळांना सुट्टी जाहीर केली आहे. यात प्रामुख्याने सांताक्रूझ, गोरेगाव, भांडुप, दादर, भायखळा या विभागातील शाळांचा समावेश आहे. काही दिवसांपूर्वीच शिक्षणमंत्री विनोद तावडे यांनी स्थानिक परिस्थिती लक्षात घेऊन शाळांना सुट्टीची घोषणा करता येईल, असे जाहीर केले होते. यानुसार काही शाळांच्या मुख्याध्यापकांनी हा निर्णय घेतला आहे.