आजच्या महागाईच्या काळात चार-पाच जणांचं कुटुंबं सांभाळणं, पालन-पोषण करणं एक मोठं आव्हान आहे. पण मिझोराममध्ये जगातील सर्वात मोठं कुटुंब एकत्र आणि तेही गुण्यागोविंदानं नांदतंय. या भव्य कुटुंबात १८१ सदस्य आहेत.
जिओना चाना हे ३९ बायका, ९४ मुलं, १४ सुना आणि ३३ नातवंडं आणि एका चिमुकल्या पतवंडासह मिझोरामच्या बटवंग गावात एका मोठ्या घरात राहतात. या घरात एकूण १०० खोल्या आहेत. जगातील सर्वात मोठ्या कुटुंबाचा प्रमुख असल्याचं जिओना अभिमानानं सांगतात. सर्वसामान्य कुटुंबाचं महिनाभराचं रेशन जिओना कुटुंब एका दिवसात फस्त करतं. तांदूळ ४० किलो, ४० कोंबड्या, २४ किलो डाळ, ५० किलो भाजीपाला त्यांना एका दिवसाच्या स्वयंपाकासाठी लागतं. डायनिंग हॉलमध्ये ५० टेबल आहेत. मात्र, त्यांचं किचन खूप लहान आहे. जिओना यांच्या बायका स्वयंपाक करतात, तर त्यांच्या मुली घरातील कामे करतात.
जिओना हे स्वतःला महाराजा असल्याचं समजतात. तळमजल्यावर त्यांनी स्वतःचे अनेक मोठ-मोठे फोटो लावले आहेत. ३९ बायकांना सांभाळणारे जिओना खरंच जगावेगळे आहेत. जेवताना जिओनांच्या बाजूला सर्वात कमी वयाच्या बायका बसतात. त्यांच्या वयोवृद्ध बायका दुसऱ्या रांगेत बसतात. त्यांची सर्वात कमी वयाची पत्नी ३३ वर्षांची आहे. सिमथांगी असं तिचं नाव आहे. त्यांचं लग्न २०००मध्ये झालं होतं. देवाच्या मनात असलं तर पुन्हा लग्न करीन, असं ते म्हणतात.