मुंबईत दरवर्षी सुमारे एक लाख ६० हजार बालकांचा जन्म होतो. त्यापैकी सुमारे १२ टक्के किंवा २० हजार नवजात बालकांना ‘हेपॅटायटिस-बी’ (कावीळ) या आजाराची प्रतिबंधक लस देण्यात येत नाही. काविळीकडे वेळीच लक्ष न दिल्यास त्यातून लिव्हल सिऱ्हॉसिस, यकृत निकामी होणे किंवा यकृताचा कर्करोग होऊ शकतो. मुंबईत खासगी रुग्णालये, प्रसूतिगृहे, महापालिका अथवा सरकारी आरोग्यकेंद्रांत ज्या बाळाचा जन्म होईल, त्याला जन्मल्यानंतर २४ तासांच्या आत काविळीची प्रतिबंधक लस मिळेल याची खातरजमा करण्याच्या दृष्टिकोनातून विशेष मोहीम सुरू करण्यात आली आहे. या मोहिमेतंर्गत काविळीवरील लस मोफत उपलब्ध करून देण्यात येणार आहे.
‘नॅशनल लिव्हर फाऊंडेशन’चे डॉ. समीर शहा, ‘मुंबई ऑब्स्टेट्रिक अॅण्ड गायनेकॉलॉजिकल सोसायटी’चे अध्यक्ष डॉ. बिपीन पंडीत तसेच केईएम रुग्णालयाचे अधिष्ठाता डॉ. अविनाश सुपे, मुंबई महापालिकेचे डॉ. चिपळूणकर यांनी या उपक्रमामध्ये सक्रिय सहभाग घेतला आहे. महानगरपालिकेच्या माध्यमातून ९१.२ टक्के नवजात बालकांना ही लस दिली जाते. उर्वरित बालकांना ही लस देण्यासाठी स्वयंसेवी संस्था तसेच खासगी रुग्णालयांचे सहकार्य घेण्यात येणार आहे. मुंबईतील सर्व प्रसूती केंद्रांमध्ये जन्मलेल्या बाळांना काविळीवरील प्रतिबंधक लस घेतल्याची खातरजमा करण्यात येईल, असा विश्वास डॉ. बिपीन पंडीत यांनी व्यक्त केला. तर नवजात बाळाला काविळीची लस दिली तर आईकडून बाळाकडे संक्रमित होणाऱ्या या आजाराला प्रतिबंध करता येऊ शकेल, असे मत डॉ. चिपळूणकर यांनी मांडले. यकृत प्रत्यारोपणतज्ज्ञ डॉ. अनुराग श्रीमल यांनी व्हायरल काविळीपासून बचावासाठी टूथब्रश, नेल कटर वा इतर वैयक्तिक वस्तू इतरांना वापरण्यास देऊ नये, याकडे लक्ष वेधले.