ठाणे जिल्ह्यात नवीन ग्रंथालय सुरू करण्यात महत्वपूर्ण योगदान देणारे तसेच भिवंडी महापालिकेच्या डॉ. बाबासाहेब आंबेडकर वाचनालयाचे माजी ग्रंथपाल शरद मराठे (७६) यांचे सोमवारी पहाटे अल्पशा आजाराने निधन झाले. दुपारी येथील हिंदू चिरशांती स्मशानभूमीत अंत्यसंस्कार करण्यात आले. यावेळी वाचन मंदिराचे अध्यक्ष सुधीर सिंगसाने, ठाणे जिल्हा ग्रंथालय संघाचे अध्यक्ष विनायक गोखले, कोकण विभाग ग्रंथालय संघाचे अध्यक्ष राजेंद्र वैती, कार्यवाह चांगदेव काळे, तालुक्यातील ग्रंथालय संघाचे कार्यकर्ते उपस्थित होते. ठाणे जिल्हा ग्रंथालय संघाचे संस्थापक सदस्य असलेले मराठे वाचन मंदिर संस्थेचे कार्यकारिणी सदस्यही होते. वाचन मंदिर संस्थेत सलग ५० वर्षांपासून अधिक काळ कार्यरत होते. ग्रंथालय चळवळीतही मराठे सतत कार्यरत होते. त्यांच्या पश्चात पत्नी नीला मराठे आणि अन्य परिवार आहे.