महाराष्ट्र वैद्यक परिषदेने बोगस डिग्री असलेल्या ५७ डॉक्टरांवर निलंबनाची कडक कारवाई केली आहे. यातील ५० डॉक्टरांना एक वर्षासाठी, तर सात डॉक्टरांना पाच वर्षांसाठी निलंबित करण्यात आले आहे. या डॉक्टरांनी महाराष्ट्र वैद्यक परिषदेकडे सादर केलेली वैद्यकीय पदवी बोगस असल्याचे तपासणीमध्ये दिसून आले आहे.
महाराष्ट्र वैद्यक परिषदेचे अध्यक्ष डॉ. शिवकुनार उत्तुरे यांनी यासंदर्भात सांगितले की, कारवाई करण्यात आलेले डॉक्टर ग्रामीण भागात सेवा देताना खासगी रुग्णालयातही वैद्यकीय तज्ज्ञ म्हणून काम करतात. दोषी आढळलेल्यांपैकी सात डॉक्टरांवर पाच वर्षांसाठी वैद्यकीय सेवा देण्यासाठी बंदी घालण्यात आली आहे, तर ५० डॉक्टर एका वर्षासाठी ही सेवा देऊ शकणार नाहीत. यापूर्वी २० डॉक्टरांवर निलंबनाची कारवाई करण्यात आली होती. बोगस पदवीच्या आधारे रुग्णसेवा दिल्याने रुग्णाच्या जिवाशी खेळ होऊ शकतो, ही रुग्णांची फसवणूक आहे तसेच त्यांच्या आरोग्याशीही खेळ असल्याने ही कडक कारवाई करण्यात आल्याचे डॉ. उत्तुरे यांनी स्पष्ट केले.