गुन्हा केल्यानंतर कोणताही पुरावा मागे राहू नये याची पुरेपुर काळजी गुन्हेगार घेत असतात. मोहम्मद अली रोड येथील दुकानातून ५५ लाख चोरणाऱ्या एका चोरट्याने ही सर्व काळजी घेतली, पण पोलिसांच्या नजरेने त्याची तुरूतुरू चाल हेरली आणि तो पोलिसांच्या जाळ्यात अडकला. ज्या रेनकोटखाली त्याने चेहरा लपविला तोच धागा पकडून लोकमान्य टिळक मार्ग पोलिसांनी जावेद सय्यद (३५) याला बुधवारी अटक केली. विशेष म्हणजे, जावेदनेच चोरीची तक्रार केली होती.
मोहम्मद अली रोडवरील झायमा इमारतीच्या चौथ्या मजल्यावर ‘पेन वर्ल्ड’ या पेनच्या घाऊक दुकानातून २३ जुलै रोजी ५५ लाखाची रोकड चोरीला गेली. सकाळी दुकान उघडताना व्यवस्थापक जावेद सय्यद याच्या हा प्रकार लक्षात आला. त्याने दुबईत वास्तव्यास असलेल्या मालकाला याबाबत सांगितले आणि मालकाच्या सल्ल्यानुसार लोकमान्य टिळक मार्ग पोलिस ठाण्यात तक्रार दाखल केली. ५५ लाखाची रोकड चोरीला गेल्याची गंभीर दखल घेत वरिष्ठ पोलिस निरीक्षक संतोष राऊत, संजय मोहिते, योगेंद्र पाचे, सहायक निरीक्षक पगारे, दळवी, उपनिरीक्षक देसाई, कुंभारे यांची चार पथके तयार करण्यात आली. चोरट्याने दुकानातील सीसीटीव्ही आणि डीव्हीआर काढून नेल्याने सीसीटीव्ही फुटेज मिळत नव्हते.
चेहऱ्यावर राखाडी रंगाचा रेनकोट घेतलेला एक इसम सोमवारी सकाळी इमारतीमध्ये शिरताना पाहिल्याचे एका स्टॉलधारकाने सांगितले. पोलिसांना याच परिसरातून एक सीसीटीव्ही फुटेज मिळाले. मात्र, यामध्ये या इसमाचा चेहरा दिसत नव्हता. दुकानाच्या सेफ्टी दरवाजाचे लॉक तोडण्यात आले होते. मात्र, ते पोलिसांना घटनास्थळी सापडले नाही. दूरवरच्या सीसीटीव्हीमधील फुटेज वारंवार पाहिले असता, त्या व्यक्तीच्या आणि तक्रारदार जावेद याच्या चालीमध्ये पोलिसांना साधर्म्य आढळले. त्यातच जावेद चालवत असलेल्या स्कूटीच्या डिकीमध्ये राखाडी रंगाचा रेनकोट सापडला. चाल, रेनकोट, तोडलेल्या दरवाज्याचे न सापडलेले लॉक यावरून पोलिसांनी जावेदलाच ताब्यात घेऊन चौकशी केली, तेव्हा चोरी उघडकीस आली.
म्हणून केली चोरी
या दुकानामध्ये जावेद १० ते १२ वर्षांपासून काम करत होता. सहा महिन्यापूर्वीच त्याचे लग्न झाले होते. मालक दुबईत असताना मुंबईत प्रामाणिकपणे काम करूनही मालक नीट वागणूक देत नसल्याने त्याला धडा शिकविण्यासाठी आणि स्वत:चा स्वतंत्र व्यवसाय सुरू करण्यासाठी चोरी केल्याचे जावेदने चौकशीत सांगितल्याचे पोलिस उपायुक्त ज्ञानेश्वर चव्हाण म्हणाले.
फ्लश टँकमध्ये रोकड
पकडले गेलो तरी रोकड पोलिसांच्या हाती लागू नये म्हणून जावेदने ५५ लाखांची रोकड प्लास्टिक पिशव्यांमध्ये बांधून शौचालयाच्या फ्लश टँकमध्ये लपवली होती. पोलिसांनी ही रक्कम जप्त केली.