भांडुपच्या पश्चिमेकडील राम कली कॉलेजच्या आवारातच गुरुवारी सुशीलकुमार वर्मा (१७) या बारावीतील विद्यार्थ्याची दिवसाढवळ्या हत्या करण्यात आली. प्रेमाच्या त्रिकोणातून सुशीलकुमारला संपविल्याचा प्राथमिक अंदाज आहे. भांडुप पोलिसांनी याप्रकरणी दोन विद्यार्थ्यांना ताब्यात घेतले असून इतरांचा शोध सुरू आहे.
भांडुपच्या रामनगर परिसरात राहणारा सुशीलकुमार हा राम कली कॉलेजमध्ये बारावीच्या विज्ञान शाखेत शिकत होता. गुरुवारी कॉलेजमध्ये परीक्षा होती. पेपर संपल्यानंतर दोन मित्र सुशीलकुमार याला घेऊन कॉलेजच्या आवारात आले. या ठिकाणी आधीच उभ्या असलेल्या काही तरुणांनी सुशीलकुमारशी हुज्जत घालण्यास सुरुवात केली. त्यांच्यामधील भांडण इतके विकोपाला गेले की, या तरुणांनी सुशीलकुमारला लोखंडी रॉडने जबर मारहाण केली. त्याच्या अंगावर वार करून त्यांनी पळ काढला. रक्ताच्या थारोळ्यात पडलेल्या सुशीलकुमारला मित्रांनी जवळच्या खासगी रुग्णालयात नेले. रुग्णालयाने दाखल करून घेण्यास नकार दिल्यामुळे त्याला अग्रवाल रुग्णालयात दाखल करण्यात आले. उपचारादरम्यान सुशीलकुमारचा मृत्यू झाला.
भांडुप पोलिसांनी याप्रकरणी हत्येचा गुन्हा दाखल करून आरोपींचा शोध सुरू केला. कॉलेजमधील इतर विद्यार्थ्यांकडून मिळालेल्या माहितीवरून पोलिसांनी दोघांना ताब्यात घेतले. सुशीलकुमारचे कॉलेजमधील एका तरुणीशी प्रेमसंबंध होते. त्याच तरुणींवर आरोपींपैकी एकजण प्रेम करत होता. याच कारणातून ही हत्या करण्यात आल्याचा प्राथमिक अंदाज आहे. दरम्यान कॉलेजमध्ये विद्यार्थ्यांचे अनेक ग्रुप असून आपापसातील वैमनस्यातून हे हत्याकांड घडल्याचेही काही विद्यार्थी सांगत आहेत. सर्व आरोपींना पकडल्यानंतर नेमके कारण समजेल, असे भांडुप पोलिसांनी सांगितले.