पिंपरी- चिंचवडमधील राहटणी येथे व्यावसायिकाची दुचाकीवरुन आलेल्या दोन अज्ञात व्यक्तींनी गोळ्या झाडून हत्या केल्याची घटना सोमवारी रात्री घडली. लुटीच्या उद्देशाने ही हत्या झाल्याचा संशय आहे.
प्रभात कॉलनी रोड परिसरात राहणारे अनिलकुमार रघुनाथराव धोत्रे (वय ४४) यांचा टूर्स अँड ट्रॅव्हल्सचा व्यवसाय असून त्यांचा काळेवाडीतील पाचपीर चौकात कार्यालय आहे. सोमवारी रात्री दररोज प्रमाणे ते दुकान बंद करून ते घरी जात होते. अनिलकुमार हे दररोज व्यवयासातून मिळणारे पैसे घरी घेऊन जायचे. सोमवारी त्यांच्याकडील काळ्या बॅगेत १ लाख ९६ हजार रुपये होते. घरापासून काही अंतरावर असताना दुचाकीवरून आलेल्या दोन हल्लेखोरांनी त्यांना हटकले आणि त्यांच्याकडील बॅग घेऊन जाण्याचा प्रयत्न केला. मात्र याला अनिलकुमार यांनी प्रतिकार केला. यानंतर एका हल्लेखोराने अनिलकुमार यांच्यावर गोळ्या झाडल्या. यात अनिलकुमार यांचा जागीच मृत्यू झाला. हल्ल्यानंतर स्थानिकांनी त्यांना रुग्णालयात दाखल केले. मात्र, रुग्णालयात दाखल करण्यापूर्वीच त्यांचा मृत्यू झालाय या घटनेचा तपास पोलीस निरीक्षक सुनील पिंजन हे करत आहेत.