पावसाच्या सरींसोबत रस्त्यांवर खड्ड्यांचे प्रमाण वाढत असून या खड्ड्यांमुळे महापालिका आर्थिकदृष्ट्या खड्ड्यात जात आहे. यंदा खड्डे बुजवण्यासाठी कोल्डमिक्स हे जर्मन तंत्रज्ञान वापरले जात असून त्यासाठी तब्बल १२५ कोटी रुपये पालिकेने मोजले आहेत. तर, खड्डे बुजवण्यासाठीचा खर्च ५० कोटींपर्यंत जाण्याची शक्यता आहे. त्यामुळे यंदाच्यावर्षी खड्डे बुजवण्यासाठीचा खर्चच १७५ कोटींच्या घरात जाणार आहे. त्याशिवाय रस्तेबांधणीसाठी दरवर्षी पालिका अडीच ते तीन हजार कोटी रुपये खर्च करते तो वेगळाच आहे.
पालिकेने यंदाच्या पावसात मुंबईत आतापर्यंत एक हजारहून अधिक खड्डे पडल्याची नोंद केली आहे. तर, मुंबईच्या विविध भागात हजारो खड्डे असल्याचा दावा सामान्य नागरिक आणि राजकीय पक्षांनी केला आहे. खड्डे बुजवण्यासाठी पालिकेने यंदा जर्मनीचे कोल्डमिक्स तंत्रज्ञान वापरण्यास सुरुवात केली आहे. पालिकेच्या वरळी येथील प्लान्टमध्ये या तंत्रज्ञानानुसार खड्डे बुजवण्याचे साहित्य बनवले जाते आहे. मुंबईत पावसात बेसुमार खड्डे पडत असल्याने पालिकेने २५०० टन साहित्य बनवण्याचा निर्णय घेतला आहे. हे साहित्य बनवण्यासाठी पालिकेच्या प्लान्टमध्ये काही बदल करावे लागणार असून त्यासाठी १२५ कोटी रुपयांचे कंत्राट देण्यात आले आहे.
मुंबई महापालिका ही आयएएस अधिकाऱ्यांची प्रयोगशाळा आहे. अधिकाऱ्यांना वाटेल ते प्रयोग इथे केले जातात. खड्ड्यांबाबतही तशीच स्थिती असल्याची टीका पालिकेतील विरोधी पक्षनेते रवी राजा यांनी केली आहे. दरवर्षी खड्ड्यांसाठी ५० कोटी रुपये कंत्राटदारांच्या खिशात घातले जातात, त्यानंतरही मुंबई खड्डेमुक्त का होत नाही, असा सवाल त्यांनी केला आहे.