नेरुळमधील डी. वाय. पाटील रुग्णालयातील प्रयोगशाळेत शुकवारी सकाळी आग लागल्याची घटना घडली. ही आग विझवताना नेरुळ अग्निशमन केंद्राचे दोन जवान जखमी झाले. त्यातील एकावर उपचार करून त्याला घरी सोडण्यात आले. दुसऱ्या जवानावर उपचार सुरू आहेत.
डी. वाय. पाटील रुग्णालयाच्या पहिल्या मजल्यावरील प्रयोगशाळेतील उपकरणे निर्जंतुकीकरण करण्यासाठी असलेल्या यंत्रामुळे ही आग लागली असल्याचे प्रथमदर्शनी अहवालात स्पष्ट झाले आहे. प्रयोगशाळेतील काम रात्री संपल्यानंतर हे यंत्र बंद करणे गरजेचे होते. मात्र, रात्रभर ते सुरूच होते. त्यामुळे त्यातील पाणी संपून गेले आणि आग लागली. ही आग विझवण्यासाठी अग्निशमन जवानांनी पाण्याचा मारा केला असता तापलेल्या यंत्राचा स्फोट झाला. त्यातील गरम रसायन अग्निशमन जवानांच्या अंगावर उडाले. त्यात जी. एन. पाटील हे गंभीररित्या जखमी झाले, तर निरंजन रोडगे यांना किरकोळ दुखापत झाली आहे.