सेवा बजावून घराकडे परणाऱ्या एस. टी. कंडक्टरचा दुचाकी घसरून पडल्याने मृत्यू झाला. ही घटना निमाणी बसस्थानक परिसरात घडली असून, या प्रकरणी पंचवटी पोलिस स्टेशनमध्ये अपघाताची नोंद करण्यात आली आहे.
सुनील शरद निकम (४३ रा. राजरत्ननगर, पवननगर, सिडको) असे मृत्यू झालेल्या वाहकाचे नाव आहे. शहर बससेवेत वाहक पदावर कार्यरत असलेले निकम गुरूवारी (दि. १२) सकाळी साडेदहा वाजेच्या सुमारास रात्रपाळीची सेवा बजावून डेपोत आले. मोपेड दुचाकीने घराकडे परतत असताना हा अपघात झाला. निमाणी बसस्थानका बाहेर पडत असताना पावसामुळे झालेल्या चिखलात त्यांची दुचाकी घसरली. या अपघातात निकम यांच्या डोक्यास वर्मी मार लागला. त्यांना तात्काळ सिडकोतील खासगी हॉस्पिटलमध्ये दाखल करण्यात आले. मात्र, उपचार सुरू असताना त्यांचा मृत्यू झाला. घटनेचा अधिक तपास सहायक पोलिस उपनिरीक्षक सरोदे करीत आहेत. निकम यांच्या पश्चात आई, पत्नी व दोन मुले असा परिवार आहे.