वांद्रे येथे आज पहाटे शासकीय वसाहतीतील एका इमारतीचा स्लॅब कोसळून झालेल्या दुर्घटनेत दोन जण गंभीर जखमी झाले आहेत. जखमींवर वांद्र्याच्या भाभा रुग्णालयात उपचार सुरू आहेत.
आज पहाटे ४.३० वाजता वांद्र्याच्या बी- २९५/५ या इमारतीत ही घटना घडली. या इमारतीतील सावंत कुटुंबीय झोपेत असताना अचानक स्लॅब अंगावर कोसळल्याने वैशाली योगेश सावतं आणि नैतिक योगेश सावंत हे दोघेही गंभीर जखमी झाले. या दुर्घटनेत दोन्ही मायलेकरांच्या अंगाला आणि हाताला मार लागाला असून दोघांनाही उपचारासाठी तात्काळ भाभा रुग्णालयात दाखल केले असून त्यांच्यावर उपचार सुरू आहेत. दरम्यान, काही महिन्यापूर्वी वरळीतील पोलीस वसाहतीतील एका इमारतीचा स्लॅब कोसळल्याने एका महिलेला नऊ टाके पडले होते. आता वांद्र्यातील शासकीय इमारतीची पडझड सुरू झाल्याने या इमारतीच्या सुरक्षेचा प्रश्न ऐरणीवर आला आहे.