बिग बॉसच्या घरातील ‘आऊ’ अर्थात उषा नाडकर्णी यांना बिग बॉसच्या घरातून बाहेर पडावे लागले आहे. रविवारी झालेल्या एपिसोडमध्ये स्मिता गोंदकर, शर्मिष्ठा राऊत आणि उषा नाडकर्णी या डेंजर झोनमध्ये होत्या. अखेर कमी मते मिळाल्यामुळे उषा नाडकर्णींना घर सोडावे लागले. आतापर्यंच्या सर्वच भाषेतील ‘बिग बॉस’च्या घरातील सर्वात ज्येष्ठ स्पर्धकाचा मान उषा नाडकर्णी यांना मिळाला होता. बिग बॉसच्या घरातील हा एक विक्रमच आहे.
उषा नाडकर्णी यांना निरोप देताना शर्मिष्ठा , मेघा, पुष्कर, सई, आस्ताद आदी घरातले सगळेच खूप भावूक झाले होते. बिग बॉसच्या घरात ७२ वर्षाच्या उषा नाडकर्णी यांनी सलग ११ आठवडे राहणे हीच मोठी कौतुकास्पद बाब असल्याचे सूत्रसंचालक महेश मांजरेकर यांनी म्हटले.
बिग बॉसच्या घरात ७७ दिवस झाले असून यापुढील टास्क अधिकच कठीण होणार आहेत. बिग बॉसच्या घरात आता आठ स्पर्धक राहिले आहेत. त्यामुळे अंतिम फेरीतील ‘टॉप फाइव्ह’साठी स्पर्धकांमध्ये चांगलीच चुरस रंगणार आहे. उषा नाडकर्णी या आठवड्यामध्ये बिग बॉस मराठीच्या घरामधून बाहेर पडल्या. बिग बॉस मराठीच्या घरात मागील आठवड्यात वाद व तणावाचे क्षण निर्माण झाले होते. पुष्कर, मेघा, सई, शर्मिष्ठा आणि आऊ यांच्या ग्रुपसाठी थोडा तणावाचा आणि वादविवादांचा ठरला. सई आणि पुष्कर यांनी मेघा यांच्यात वाद निर्माण झाले. परंतु आता सईने मेघाला आपण सगळे विसरून जाउया असे सांगत वादावर पडदा टाकण्याचा प्रयत्न केला. तर, मेघाने पुष्करला माफ करणार नसल्याचे सांगितले. त्यामुळे येत्या आठवड्यामध्ये पुष्कर, मेघा, सई, शर्मिष्ठा यांच्यातील वाद मिटतील का? याची उत्सुकता प्रेक्षकांना लागली आहे.