मुसळधार पावसामुळे ठिकठिकाणच्या नाल्यांना पूर आलेला असतानाच, शाळेतील विद्यार्थ्यांची व्हॅनमधून ने-आण करणारा एक चालका आपल्या व्हॅनमधील मुलांना सुरक्षित ठिकाणी ठेवण्याची धडपड करत असतानाच, नाल्यातून वाहून गेल्याची हृदयद्रावक घटना सोमवारी दुपारी विरार पश्चिमेला घडली. प्रकाश पाटील (४५, रा. पारोळ) असे या चालकाचे नाव असून त्यांचा मृतदेह सायंकाळी आढळून आला. या स्कूलव्हॅनमधील सर्व चारही मुलांना या चालकाने आधीच सुरक्षित ठिकाणी उभे केल्याने ती बचावली.
प्रकाश पाटील हे त्यांच्या मॅजिक या वाहनाने विद्यार्थ्यांची ने-आण करण्याचे काम करीत होते. विरार पश्चिमेस असलेल्या खारोडी नाका येथील मॅट्रीक्स शाळेतील चार मुलांना शाळा सुटल्यानंतर व्हॅनने पारोळ येथे घरी सोडण्यासाठी पाटील हे सोमवारी दुपारी निघाले होते. ग्लोबल सिटी येथील रुस्तमजी शाळेच्या परिसरात रस्त्यावर मोठ्या प्रमाणात पाणी साचले होते. त्यामुळे नाला आणि रस्त्यावरील पाणी यांतील फरकही लक्षात येत नव्हता. प्रचंड पाऊस आणि त्यातच साचलेल्या पाण्याचा अंदाज येत नसल्याने प्रकाश पाटील यांनी गाडी बाजूला थांबवून त्यातील सर्व विद्यार्थ्यांना सुरक्षित ठिकाणी उभे केले. आजुबाजूचे काही लोकही त्यांच्या मदतीला आले. मात्र पाण्याचा अंदाज न आल्याने प्रकाश पाटील स्वत: मात्र नाल्यात पडून वाहून गेले. दुपारी तीन वाजण्याच्या सुमारास ही घटना घडली. दीड किलोमीटर अंतरावर सायंकाळी ५ वाजण्याच्या सुमारास त्यांचा मृतदेह मिळाल्याची माहिती पोलिसांनी दिली.
अर्नाळा सागरी पोलिस ठाण्यात या घटनेची नोंद करण्यात आली आहे. घटना घडल्याचे समजल्यानंतर पालिकेच्या फायरब्रिगेडने घटनास्थळी भेट देऊन जिथून पाटील हे वाहून गेले, तेथे पत्र्याचे बॅरीकेटिंग लावले.
मुलांना वाचवले
प्रकाश पाटील यांनी आपल्या व्हॅनमधील मुलांना सुरक्षितपणे बाजूला काढले. पण त्याचवेळी ते स्वत: मात्र वाहून गेले. या विद्यार्थ्यांना सुरक्षितपणे त्यांच्या पालकांच्या ताब्यात देण्यात आले आहे.