डोंबिवली पूर्वेला असलेल्या MIDC परिसरात सोमवारी रात्री ११ वाजता महानगर गॅसच्या पाईपलाइनमध्ये अचानक सुरू झालेली गळती तब्बल तीन तासानंतर रोखण्यात आली आहे. अचानक सुरू झालेल्या या गॅस गळतीमुळे स्थानिकांमध्ये प्रचंड घबराट निर्माण झाली होती, काही लोकांनी तर भीतीपोटी अख्खी रात्र जागून काढली होती. मात्र तीन तासानंतर गॅस गळती बंद झाल्याने स्थानिकांनी सुटकेचा नि:श्वास सोडला आहे.
डोंबिवली पूर्वेकडील मॉडेल कॉलेजजवळील मिलाप नगरमध्ये सोमवारी रात्री ११ वाजता गॅस गळती सुरू झाली होती. त्यामुळे सर्वत्र गॅसचा वास पसरल्याने एमआयडीसीतील नागरिकांनी महानगर गॅस कंपनीला तक्रार केली. त्यानंतर महानगर गॅस कंपनीच्या कर्मचाऱ्यांनी तात्काळ घटनास्थळी धाव घेऊन मिलाप नगर आणि विको नाका परिसरात गॅस गळतीचे ठिकाण शोधण्यास सुरुवात केली. मिलाप नगर येथील सूर्यप्रकाश सोसायटीमधील मेन व्हॉल्व्हच्या पॉइंटमधून गॅस गळती होत असल्याचं लक्षात आल्यानंतर कर्मचाऱ्यांनी तात्काळ कामास सुरुवात केली. तब्बल तीन तासाच्या अथक प्रयत्नानंतर मध्यरात्री २ वाजता ही गॅस गळती रोखण्यात कर्मचाऱ्यांना यश आलं. दरम्यान, या निवासी परिसरातील पाईप गॅस सेवा काही काळासाठी बंद ठेवण्यात आली आहे.