भारतीय पर्यटकांना आता दुबईमध्ये व्हिसाशिवाय दोन दिवसांचे वास्तव्य करता येणार आहे. संयुक्त अरब अमिरातच्या सरकारने (यूएई) भारतीय पर्यटकांना आकर्षित करण्यासाठी हा महत्त्वपूर्ण निर्णय घेतला आहे. त्यानुसार भारतीय पर्यटकांना दोन दिवसांचा मोफत प्रवासी व्हिसा प्राप्त होणार आहे. दोन दिवसांचा मोफत ट्रान्झिट व्हिसा मिळणार, याचा अर्थ असा की दुबई किंवा अबुधाबीवरून प्रवाशांना जगभरात कोठेही जायचे असल्यास त्यांना ४८ तासांच्या वास्तव्यासाठी एक रुपयाही खर्च करावा लागणार नाही.
त्यापेक्षा अधिक मुक्काम करायचा असल्यास ५० दिरहॅम अर्थात १००० रुपयांचे शुल्क देऊन ९६ तास अर्थात चार दिवस राहण्याची सुविधा उपलब्ध होणार आहे. मात्र, ही सुविधा नेमकी कधीपासून सुरू होणार, याविषयी कोणतेही स्पष्टीकरण देण्यात आलेले नाही. यूएईचा ट्रान्झिट व्हिसा दुबईतील विमानतळावर उभारलेल्या ‘पासपोर्ट कंट्रोल हॉल’मधून घेतला जाऊ शकतो.
दुबई आणि अबुधाबीला जाण्याचा प्रवासखर्च घटल्याने भारतीय पर्यटकांकडून या ठिकाणांना अधिक पसंती दिली जाते. २०१७मध्ये जवळपास ३.७० लाख भारतीय पर्यटकांनी दुबईला कूच केले. ही संख्या २०१६च्या तुलनेत ११ टक्के अधिक आहे. यूएईशिवाय इस्राइल, जपान, ओमान आदी देशांनी भारतीय पर्यटकांसाठी व्हिसाचे नियम शिथिल केले आहेत.