महापालिकेकडून धोकादायक झाडांच्या फांद्या छाटण्यासाठी विशेष मोहीम राबवली जात असताना, खासगी जागांवरील झाडांच्या फांद्या छाटण्यास टाळाटाळ होत आहे. त्यामुळे मोठ्या प्रमाणात जीवित आणि वित्तहानी होत आहे. पालिकेने केलेल्या झाडांच्या सर्वेक्षणानंतर खासगी हद्दीतील चार हजार झाडांच्या फांद्या छाटण्यासाठी फेब्रुवारीत नोटीस दिल्यानंतर, अजून एक हजार झाडांची छाटणी न झाल्याने ती धोकादायक स्थितीत उभी असल्याचे पालिकेला आढळून आले आहे.
मुंबईत सुमारे २९ लाख झाडे असून, त्यापैकी एक लाख २२ हजार झाडे रस्ताच्या दुतर्फा, उद्यानांमध्ये आहेत, तर १५ लाख झाडे खासगी जागेवर आणि उरलेली सरकारी जागेच्या हद्दीत आहेत. मुंबईकरांच्या सुरक्षेसाठी पालिकेने फेब्रुवारीपासून झाडांचे सर्वेक्षण सुरू केले. यामध्ये पालिकेची जबाबदारी असलेल्या एक लाख २२ हजार झाडांपैकी ८८ हजार, तर खासगी जागेवरील चार हजार झाडांच्या फांद्यांची छाटणी करावी लागणार असल्याचे स्पष्ट झाले होते. पालिकेने आपल्या ८८ हजार झाडांची छाटणी १ जूनपर्यंत पूर्ण केली. मात्र खासगी हद्दीतील नोटीस दिलेल्या केवळ तीन हजार झाडांची छाटणी करण्यात आली आहे.
१७ दिवसांत ५८७ दुर्घटना
यंदाच्या १ जूनपासून झाडे पडल्याच्या पालिकेच्या क्षेत्रात ४६, तर खासगी क्षेत्रात १५३ घटना घडल्या. फांद्या कोसळण्याच्या खासगी क्षेत्रात ३५२ आणि पालिका हद्दीत १८२ घटना घडल्या. खासगी क्षेत्रात घडलेल्या दुर्घटना ५३४ तर पालिका क्षेत्रात घडलेल्या दुर्घटना १९९ मिळून एकूण ६४३ दुर्घटना घडल्या आहेत. खासगी आस्थापनांनी जीवित आणि वित्तहानी टाळण्यासाठी पावसाळ्याआधीच धोकादायक झाडांची छाटणी करावी, असे आवाहन उपायुक्त डॉ. किशोर क्षीरसागर यांनी केले आहे.
…
दोन संस्थांविरुद्ध पोलिसात तक्रार
अंधेरी पश्चिम येथील जीवन सुधा को. ऑप. सोसायटीच्या आवारातील गुलमोहराचे झाड कोसळून १६ जून यश देसाई यांचा मृत्यू झाला. या झाडाच्या बुंध्यावर आरपार छिद्र असल्याने जमिनीपासून १५ फुट उंचीपर्यंत झाडाचा शेंडा छाटण्यास पालिकेने सोसायटीला परवानगी दिली होती. सोसायटीने ते न केल्याने झाड कोसळून दुर्घटना घडल्याचे पालिकेने जुहू पोलिस ठाण्याला दिलेल्या तक्रारीत म्हटले आहे. मालाड पूर्व येथील वेल्फेअर सोसायटीत झाडाच्या फांद्या छाटण्यासाठी गेलेले पालिकेचे कर्मचारी जितेंद्र चिंधालिया यांना जालिम सिंग व गणेश सिंग यांनी मारहाण केली. त्यामुळे पालिकेने या दोघांविरुद्ध कुरार पोलिस ठाण्यात तक्रार केली आहे.
झाडांची स्थिती
– मुंबईत एकूण २९ लाख ७५ हजार २८३ झाडे
– खासगी जमिनींवर १५ लाख ६३ हजार ७०१ झाडे
– सरकारी जमिनींवर ११ लाख २५ हजार १८२ झाडे
– रस्ते, फूटपाथवरील झाडे १ लाख ८५ हजार ३३३
– उद्याने, व बगिचांमधील झाडे १ लाख १ हजार ६७
…
झाडे कोसळून झालेल्या दुर्घटना
– जून २०१७ : कुलाबा नेव्हीनगरमध्ये १४ वर्षीय मुलाचा मृत्यू.
– १ जुलै २०१७ : ४५ वर्षीय रिक्षाचालक राजाराम यादव यांचा बोरिवली येथे रिक्षावर झाड कोसळून गंभीर जखमी झाल्याने मृत्यू.
– २२ जुलै २०१७ : दूरदर्शनच्या वृत्तनिवेदिका कांचन नाथ यांचा चेंबूरमध्ये नारळाचे झाड अंगावर पडून मृत्यू.
– ७ डिसेंबर २०१७ : चेंबूर येथे शारदा घोडेस्वार यांचा अंगावर झाड पडून मृत्यू.
– १३ एप्रिल २०१८ मुंबई मराठी ग्रंथसंग्रहालयाच्या आवारातील झाड पडून दिनेश सनगले यांचा मृत्यू.
– २९ मे २०१८ : वाळकेश्वर येथे झाडाची फांदी पडून लिला सुखी (९१) यांचा मृत्यू.
– ९ जून २०१८ : दहिसरमध्ये दृष्टी मुंगरा (१४) या मुलीचा झाड अंगावर पडल्याने मृत्यू.
– १८ जून २०१८ : अंधेरी येथे झाडाची फांदी अंगावर पडून यश देसाई (५०)यांचा मृत्यू.