विवाहितेला पाच लाख रुपये आणण्याची मागणी करीत रॉकेल टाकून पेटवून ठार मारण्याचा प्रयत्न करण्यात आला. हिनानगर, रशीदपुरा भागात सोमवारी रात्री हा प्रकार घडला. याप्रकरणी सासरच्या पाच आरोपींविरुद्ध सिटीचौक पोलिस ठाण्यात खुनाचा प्रयत्न केल्याप्रकरणी गुन्हा दाखल करण्यात आला आहे.
पीडित महिलेने मंगळवारी या प्रकरणी तक्रार दाखल केली. या विवाहितेचा लग्न झाल्यापासून सप्टेंबर २०१४पासून विविध कारणांनी छळ सुरू होता. ही विवाहिता सोमवारी आईच्या घरी राहण्यासाठी आली होती. यावेळी संशयित आरोपी आतिक शेख जहीरोद्दीन शेख, जहीरोद्दीन शेख, शेख आवेज, लियाकतखान व विवाहितेची सासू (सर्व रा. कैसर कॉलनी) हे तिच्या घरी आले. पाच लाख रुपये घेऊन आताच आमच्या सोबत चल, अशी मागणी त्यांनी केली. विवाहितेने पैसे देण्यास नकार दिला. यावेळी तिचा पती व त्याच्या भावाने तिला मारहाण केली; तसेच सासूने रॉकेल टाकून पेटवून दिले. याप्रकरणी विवाहितेच्या तक्रारीवरून पाच आरोपींविरुद्ध खुनाचा प्रयत्न केल्याप्रकरणी गुन्हा दाखल करण्यात आला आहे. पोलिस उपनिरीक्षक नागरे याप्रकरणी तपास करीत आहेत.