बलात्काराचा आरोप सामंजस्याने मागे घेण्यासाठी २५ हजार रुपयांची लाच मागणाऱ्या सेलू पोलिस स्टेशनमधील महिला पीएसआयला लाचलूचपत प्रतिबंधक विभागाच्या पथकाने रंगेहात अटक केली. राजश्री रामटेके, असे या महिला पीएसआयचे नाव असून ही कारवाई मंगळवारी दुपारी १२ वाजताच्या सुमारास सेलू पोलिस स्टेशनमध्ये करण्यात आली.
तक्रारकर्त्याच्या लहान भावाविरोधात सेलू पोलिसांत बलात्काराचा गुन्हा दाखल आहे. पीडित महिलेने प्रकरण आपसातील असल्याने प्रतिज्ञापत्रावर पुढील कारवाई न करण्यासाठी विनंती केली होती. परंतु सदर गुन्ह्यात तपासी अधिकारी महिला पोलिस उपनिरीक्षक राजश्री रामटेके हिने कारवाई न करण्यासाठी २५ हजार रुपयांच्या लाचेची मागणी केली होती. याप्रकरणी लाचलुचपत प्रतिबंधक विभागाच्या वर्धा पथकाने १ जून रोजीच पडताळणी केली होती. मंगळवारी दुपारी १२ वाजताच्या सुमारास लाचलुचपत प्रतिबंधक विभागाच्या पथकाने सेलू पोलिस स्टेशन येथे सापळा रचला. यावेळी तक्रारकर्त्याकडून पोलिस उपनिरीक्षक राजश्री रामटेके ही लाचेचे २५ हजार रुपये स्वीकारत असताना तिला रंगेहाथ अटक करीत लाचेची रक्कम हस्तगत केली. ही कारवाई लाचलुचपत प्रतिबंधक विभागाचे नागपूर येथील पोलिस अधिक्षक पी. आर. पाटील व अतिरिक्त पोलिस अधिक्षक राजेंद्र नागरे यांच्या मार्गदर्शनाखाली लाचलुचपत प्रतिबंधक विभाग वर्धा येथील पोलिस उपअधिक्षक बाळासाहेब गावडे, पोलिस निरीक्षक सुहास चौधरी, पोलिस नाईक अतुल वैद्य, श्रीधर उईके, रोशन निंबाळकर, सागर भोसले, विजय उपासे यांच्यासह महिला पोलिस शिपाई लीना सुरजुसे यांच्या पथकाने केली.