संयुक्त राष्ट्रसंघाने २१ जून हा ‘आंतरराष्ट्रीय योग दिन ‘ म्हणून साजरा करण्यास मान्यता दिली असून हा ‘योग दिन’ महाराष्ट्रातील शाळा-कॉलेजांमध्ये साजरा केला जात आहे. याबरोबरच यापुढे राज्यातील सर्व शाळांमध्ये दर महिन्याच्या २१ तारखेला योगासाठी स्वतंत्र वेळ राखून ठेवावा, अशी घोषणा शालेय शिक्षण आणि क्रीडा मंत्री विनोद तावडे यांनी गुरुवारी केली.
क्रीडामंत्री तावडे यांनी गुरुवारी सकाळी व्हिडीओ कॉन्फरन्सिंगद्वारे राज्यातील क्रीडा अधिकारी आणि शिक्षणाधिकारी यांच्याशी संवाद साधला. दरवर्षी २१ जून रोजी योग दिवस साजरा केला जात आहे. त्याचबरोबर प्रत्येक महिन्याच्या २१ तारखेला शाळांमध्ये योग दिवस साजरा करावा आणि किमान अर्धा तास विद्यार्थ्यांना योग शिकवावा. महिन्याच्या २१ तारखेला सुट्टी असल्यास, त्या अगोदर किंवा नंतर योग दिवस साजरा करण्यात यावा. योगामुळे विद्यार्थ्यांचे व्यक्तिमत्व विकसित होण्याबरोबरच आजच्या धावपळीत आवश्यक असणारी चपळता, एकाग्रता वाढण्यास मदत होईल, असे तावडे यांनी स्पष्ट केले. ‘मिशन वन मिलिअन’वेळी राज्यभरात राबविलेल्या अभियानाचे सर्व फोटो एकाच संकेतस्थळावर उपलब्ध करून देण्यात आले होते. याच पार्श्वभूमीवर, योग दिनानिमित्त राज्यभरात होणाऱ्या कार्यक्रमाचे फोटो एकाच संकेतस्थळावर उपलब्ध करण्यात यावे आणि त्यासाठी स्वतंत्र संकेतस्थळ तयार कण्यात यावे. योग दिन फक्त २१ जून रोजीच साजरा करून उद्दिष्ट साध्य होणार नाही. या दिनाच्या पार्श्वभूमीवर जिल्ह्यामध्ये योग महोत्सव आयोजित करण्यात यावेत, यात विद्यार्थ्यांना सहभागी करून घेणे आवश्यक आहे, असेही ते म्हणाले.