चेंबूरमधील एका कॅफेमध्ये वाढदिवसाची पार्टी सुरू असतानाच अचानक काही जणांनी घुसून गोळीबार केल्याची घटना गुरुवारी रात्री घडली. या गोळीबारात सुदैवाने कोणीही जखमी झाले नसून गोवंडी पोलिसांनी या प्रकरणी एका महिलेसह पाच जणांना अटक केली आहे. पार्टीत शिरून गोळीबार करण्यामागील कारणांचा तपास केला जात आहे.
सायन कोळीवाड्यात राहणाऱ्या श्वेता पांडे (२४) हिने राकेश सोनावणे (३०) या मित्रासह चेंबूरमधील ऑरेंज मिंट कॅफेमध्ये गुरुवारी वाढदिवसाची पार्टी ठेवली होती. या पार्टीत तिने मित्रमैत्रिणींना आमंत्रण दिले होते. पार्टी सुरू
असतानाच रात्री २.१५च्या सुमारास काही जण त्यात सहभागी झाले. त्यातील एकाने आपल्याकडील बंदूक काढून श्वेतावर गोळ्या झाडल्या. सुदैवाने श्वेता त्यातून बचावली आणि ती राकेशसह तिथून सुरक्षितपणे बाहेर पडण्यात यशस्वी ठरली.
गोळीबार झाल्याचे वृत्त कळताच गोवंडी आणि चेंबूर पोलिसांनी लगेचच वेढा घालून हल्लेखोरांना बाहेर पडू न देण्याची व्यूहरचना केली. महिलेसह पाच जणांना अटक करण्यात पोलिसांना यश आले. त्यात नवी मुंबईतील प्रवीणा राठोड (३२), तिचा पती जतीन अहुजा (३३), चेंबूरमधील घाटला भागात राहणारा राहुल भोसले (२१), वाशी नाका भागात राहणारा अश्फाक अख्तर (३०), रशीद शेख (३०) यांना अटक करण्यात आली. गोवंडी पोलिसांनी त्यांच्यावर हत्येचा प्रयत्न आणि बेकायदा शस्त्र बाळगण्याचे गुन्हे नोंदवले आहेत. त्यांच्याकडून ७.६५ मिमी पिस्तुल आणि दोन रिकाम्या पुंगळ्या जप्त करण्यात आल्या आहेत.
श्वेताने काही दिवसांपूर्वी अहुजाकडून सेकंडहँड गाडी विकत घेतली होती. पण त्याचे पैसे न देता ती गायब झाली होती. तिच्या मागावर असलेल्या अहुजाला पार्टीची खबर लागल्याने त्याने तिला पकडण्याच्या हेतूने पार्टीत शिरकाव केला. गोळ्या झाडून पळून जाता येईल, अशी त्यांची योजना होती. पण पोलिसांनी त्यांचा डाव हाणून पाडला.