मराठी बिग बॉस शो सुरु झाला तेव्हापासून, अगदी पहिल्या दिवसापासून बिग बॉसच्या घरात अनेक टि्वस्ट पाहायला मिळत आहेत. काही स्पर्धकांना आरोग्याच्या तक्रारीमुळे बिग बॉसच्या घरातून अचानक एक्झिट घ्यावी लागली आहे. अभिनेता सुशांत शेलारची तब्येतही अचानक बिघडली होती. गुरुवारी बिग बॉसने सुशांतच्या एक्झिटविषयीची अनाऊन्समेंट केली आणि सगळेच त्याच्या तब्येतीविषयी चिंतेत पडले. पण तो बरा असल्याचेही बिग बॉसने सांगितले.
भूषण कडूला काल बिग बॉसने कन्फेशन रुममध्ये बोलावले आणि निरोप दिला की दोन रिकाम्या बॅगा पाठवल्या जातील, त्यात सुशांतचं सर्व सामान भरून सोबत त्याच्या नावाची पाटीही काढून पाठवावी. त्याला तीव्र अॅसिडीटी झाली आहे, मात्र तो आता बरा आहे. डॉक्टरांनी त्याला आराम करण्याचा सल्ला दिल्याने तो बिग बॉसच्या घरातून रजा घेत आहे.
सुशांतबद्दलचा निरोप मिळताच सर्वच स्पर्धक भावूक झाले. आस्तादला तर सुशांतच्या नावाची पाटी काढताना रडू कोसळले. मेघाला तर विश्वास आहे की सुशांत तब्येत ठीक झाल्यावर परत घरी येईल.
यापूर्वी ऋतुजा धर्माधिकारीदेखील तब्येतीच्या कारणास्तव बिग बॉसमधून बाहेर पडली आहे. एका टास्कच्या वेळी तिच्या हाताला दुखापत होऊन फ्रॅक्चर झाला होता. पण एका एपिसोडमध्ये ऋतुजाने व्हिडिओ कॉलच्या माध्यमातून ती परतणार असल्याचे सांगितले होते.