अवघ्या दहा दिवसांवर मुंज आलेल्या मुलाचा राहत्या घरात बंद खोलीत गळफास घेतलेल्या अवस्थेतील मृतदेह आढळून आला. चिमुरड्याच्या मृत्यूने कुटुंबीय हादरून गेले आहेत. सोमवारी (२३ एप्रिल) दुपारी तीनच्या सुमारास निगडी येथील अप्पूघरच्या पाठीमागे असलेल्या सिद्धीविनायकनगरी येथे ही घटना उघडकीस आली.
नकुल उल्हास कुलकर्णी (८, रा. श्री विहार सोसायटी, सिद्धीविनायकनगरी) असे मृत्यू झालेल्या चिमुरड्याचे नाव आहे. पोलिस आणि स्थानिकांनी दिलेल्या माहितीनुसार, ‘नकुल याची मे महिन्यात मुंज होती. त्यासाठी त्याच्या कुटुंबातील सर्वजण तयारी करत होते. निमंत्रण पत्रिका वाटण्याचे काम सुरू होते. सोमवारी दुपारी खेळून आल्यावर नकुल घरामध्ये आला, तेव्हा नकुलचे वडील निमंत्रण पत्रिका वाटण्यासाठी बाहेर गेले होते. नकुल घरात आल्यावर स्टडी रूममध्ये गेला. दुपारी अनेकदा तो याच खोलीत झोपत असे. सोमवारीदेखील त्याने दार लावून घेतले, तेव्हा आजी-आजोबा व मोठी बहीण घरात होते. नकुल खोलीत गेल्यावर काही वेळाने त्याचा ओरडल्यासारखा आवाज आला. त्यामुळे त्याच्या आजोबांनी दार वाजविले. नकुलला हाका मारल्या; परंतु आतून काहीच प्रतिसाद आला नाही. त्यामुळे त्याच्या आजोबांनी नकुलच्या वडिलांना बोलावून घेतले. त्यांनी नागरिकांच्या मदतीने दार तोडले असता, नकुल गळफास घेतलेल्या अवस्थेत आढळून आला. त्यानंतर कुटुंबीयांनी तातडीने त्याला नजीकच्या एका खासगी हॉस्पिटलमध्ये नागरिकांच्या मदतीने दाखल केले; परंतु उपचारांपूर्वीच त्याचा मृत्यू झाल्याचे डॉक्टरांनी घोषित केले.’
भिंतीला पर्स अडकविण्याच्या खिळ्याला इलॅस्टिकच्या पट्ट्याचे एक टोक, तर दुसरे टोक नकुलच्या गळ्यात गुंडाळलेल्या अवस्थेत होते. त्याखाली पांघरुणांच्या घड्या घालून ठेवल्या होत्या. नकुल खेळताना या पांघरूणांवर चढला असताना, पांघरूणे सटकल्याने त्याला गळाफास लागला असावा; किंवा त्याने गळफास लावून घेतला असवा, अशा दोन शक्यता पोलिस तपासून पाहत आहेत. नकुलचे वडील आयटी इंजिनीअर असून, आई शिक्षिका आहे. त्याच्या पश्चात आई-वडील, बहीण, आजी-आजोबा असा परिवार आहे. देहूरोड पोलिस तपास करीत आहेत.