मुंबईचे माजी पोलीस आयुक्त अरुप पटनायक यांनी ओडिशाचे मुख्यमंत्री नवीन पटनायक यांच्या नेतृत्वाखालील बिजू जनता दलात प्रवेश केला आहे. दरम्यान, त्यांच्याकडे अद्याप पक्षाची कोणतीही जबाबदारी सोपविण्यात आलेली नाही.
भुवनेश्वर येथे एका कार्यक्रमात मुख्यमंत्री नवीन पटनायक यांच्या उपस्थितीत अरुप पटनायक यांनी बीजेडीत प्रवेश केला. माझ्या स्वत:च्या राज्यात काम करण्याची बीजेडीने मला संधी दिली. माझ्याकडे कोणतीही जबाबदारी सोपविण्यात आली नसली तरी सामान्य कार्यकर्ता म्हणून मी पक्षासाठी काम करणार असल्याचं पटनायक यांनी सांगितलं. १९७९च्या बॅचचे आयपीएस ऑफिसर असलेले पटनायक ३० सप्टेंबर २०१५ रोजी मुंबई पोलीस दलातून निवृत्त झाले आहेत. निवृत्तीनंतर त्यांनी सामाजिक कार्यास सुरुवात केली होती. कर्करोग पीडितांसाठी काम करणाऱ्या सामाजिक संस्थांबरोबर ते कार्यरत होते. यापूर्वी मुंबईचे माजी पोलीस आयुक्त सत्यपाल सिंह यांनीही भाजपमध्ये प्रवेश करून उत्तर प्रदेशची निवडणूक लढवली होती. त्याआधीही अनेक पोलीस अधिकाऱ्यांनी निवृत्तीनंतर राजकारणात प्रवेश केला होता.