रेल्वे मंत्रालयाने महाराष्ट्रातील रेल्वे तिकिटांवर स्थानकांची नावे मराठीत देण्याचा निर्णय घेतला आहे. त्याची अंमलबजावणी १ मेपासून होणार आहे. त्यामुळे लोकलप्रमाणेच मेल/एक्स्प्रेस प्रवासातही तिकिटांवर लवकरच याप्रकारे बदल पाहता येतील. त्यामुळे तिकिटांवर छत्रपती शिवाजी महाराज टर्मिनस, लोअर परळ, परळ, विक्रोळी, भायखळा अशी नावे झळकणार आहेत.
लोकल प्रवासात डब्यांमध्ये होणारी उद्घोषणा मराठी, हिंदी, इंग्रजी अशा तिन्ही भाषांमध्ये होते. पण तिकिटांवर केवळ हिंदी आणि इंग्रजी भाषेचाच वापर होतो. त्यात मराठीस स्थान देण्यात आले नसल्याने त्याबाबत वारंवार नाराजी व्यक्त केली जात होती. त्याची दखल घेत रेल्वे प्रशासनाने मराठी भाषेचाही त्यात समावेश करण्याचा महत्त्वाचा निर्णय घेतला आहे. त्यामुळे राज्यातील सर्वच स्थानकावर त्याची अंमलबजावणी होणार असून त्यात तिकिटावर पहिल्या आणि शेवटच्या स्थानकाचे नावे मराठीत छापले जाणार आहे.
सेंटर फॉर रेल्वे इन्फॉर्मेशन सिस्टिम (क्रिस)तर्फे ही सर्व कामे केली जाणार आहेत. १ मे रोजी महाराष्ट्र दिनाचे औचित्य साधून त्याची सुरुवात होईल. केंद्र सरकारच्या स्थानिक भाषेस प्रोत्साहन देण्याच्या धोरणाची अंमलबजावणी रेल्वे मंत्रालयातर्फे केली जात आहे.