रमाई व पंतप्रधान घरकुल आवास योजनेच्या लाभार्थी यांना महापालिकेचे कर्मचारी व अधिकारी त्रास देत असल्याचा आरोप करीत मंगळवारी आमदार रवी राणा यांच्या युवा स्वाभिमानी संघटनेच्या कार्यकर्त्यांनी मनपा आयुक्त हेमंतकुमार पवार यांची खुर्ची त्यांच्या दालनासमोरील उड्डाणपुलाला टांगली. युवा स्वाभिमानाच्या या आंदोलनाने शहरात मोठी खळबळ उडाली आहे.
महापालिकेत प्रत्येक कामासाठी अधिकारी पैसे मागत असल्याचा आंदोलनकर्त्यांचा आरोप आहे. एका घरकुलमागे २० हजार रुपये मागितले जात असल्याचे संघटनेचे म्हणणे आहे. याबाबत अनेकदा आयुक्त हेमंतकुमार पवार यांना तक्रार करूनदेखील त्यांनी कारवाई न केल्याने संघटनेचे कार्यकर्ते दुपारी त्यांच्या दालनात धडकले. मात्र आयुक्त रजेवर असल्याने चक्क त्यांची खुर्ची दालनाबाहेर काढण्यात आली. उपस्थित मनपा अधिकारी, कर्मचारी व सुरक्षा रक्षकांनी विरोध दर्शविला. मात्र आंदोलकांनी विरोध मोडीत काढून मनपासमोरून जाणाऱ्या उड्डाणपुलास खुर्चीला टांगले. यावेळी घोषणादेखील देण्यात आल्या. आंदोलकांनी आयुक्तांच्या खुर्चीला फाशी देत असल्याचे घोषणा दिल्या. अत्यंत वर्दळीच्या राजकमल चौक येथे झालेल्या या आंदोलनाने वाहतूक ठप्प झाली होती. बघ्यांची मोठी गर्दी जमली होती.