कुर्ला टर्मिनसहून भुवनेश्वरसाठी निघालेल्या अनिवासी भारतीय असणाऱ्या देवी पिल्ले (७६) यांचा २१ दिवसांपासून थांगपत्ता लागलेला नाही. दक्षिण आफ्रिकेत राहणाऱ्या पिल्ले काही कामानिमित्त मुंबईत आल्या होत्या. तिथून त्या भुवनेश्वरला जाण्यासाठी निघाल्या. पण तिथे पोहोचल्या नसल्याने कुर्ला रेल्वे पोलिसांनी त्यांचा शोध सुरू केला आहे.
कुलाब्यातील गेस्ट हाऊसमध्ये मुक्काम केलेल्या पिल्ले यांनी २३ फेब्रुवारीला भुनवेश्वर गाठण्यासाठी टॅक्सीने कुर्ला टर्मिनस येथे आल्या. भुवनेश्वर एक्स्प्रेस पकडण्यासाठी त्या रात्री ११.४५च्या सुमारास टर्मिनस येथे पोहोचल्या. त्यांना टॅक्सीचालक प्रेमचंद यादवने या एक्स्प्रेसपर्यंत नेले. पण प्रत्यक्षात त्या भुवनेश्वरला पोहोचल्या नाहीत. पिल्ले यांचा संपर्क होत नसल्याचे पाहून त्यांच्या मुलीने आणि एका सहकाऱ्याने दक्षिण मुंबईतील गेस्ट हाऊसमध्ये त्यांनी चौकशी केली असता, व्यवस्थापनाने पिल्ले यांचा संपर्क होत नसल्याचे पाहून पोलिस तक्रार नोंदवली.
कुर्ला रेल्वे पोलिसांनी त्यासाठी विशेष पथक स्थापन केले आहे. कुर्ला टर्मिनस येथील सीसीटीव्ही फुटेजची पाहणी केली असता पिल्ले या गाडीत बसल्याचे आढळून आले. पण त्यापुढे त्यांचा थांगपत्ता न लागल्याने तपास सुरू केल्याचे कुर्ला रेल्वे पोलिस ठाण्याचे वरिष्ठ पोलिस निरीक्षक महेश बळवंतराव यांनी सांगतिले.