परीक्षेच्या काळातच मुलीचा जन्म झाला, अशा परिस्थीतीत नेटाने प्रयत्न करीत पोलिस उपनिरीक्षक पदाची परीक्षा उतीर्ण केली. पतीच्या पोटाच्या विकाराच्या आजारासह समर्थपणे संपूर्ण कुटुंबाला सांभाळत आपल्या कर्तव्यातही कुठे कसूर होऊ दिली नाही. पतीच्या मृत्यूनंतरही त्यांनी खंबीरपणे संयुक्त कुटुंबाचा वारसा पुढे चालवत बेगमपुरा पोलिस ठाण्याच्या पोलिस निरीक्षक राजश्री आडे आपली जबाबदारी सक्षमपणे सांभाळत आहेत.
राजश्री आडे सध्या बेगमपुरा पोलिस ठाण्याच्या पोलिस निरीक्षक म्हणून कार्यरत आहेत. आडे यांचे महाविद्यालयीन शिक्षण परभणी आणि लातूर येथे झाले. २००३ मध्ये वामनराव राठोड यांच्यासोबत त्यांचा विवाह झाला. २००४ साली त्या पीएसआयसाठीच्या स्पर्धा परीक्षेची तयारी करीत होत्या. याच काळात कन्या जिविदाचा जन्म झाला. संसार, मुलीचा सांभाळ करत त्यांनी राज्य लोकसेवा आयोगाची परीक्षा उत्तीर्ण केली. नाशिक येथे ट्रेनिंग पूर्ण केल्यानंतर त्यांची नेमणूक औरंगाबाद पोलिस आयुक्तालय क्षेत्रात झाली. २००७ ते २०११ या कालावधीत सिटीचौक पोलिस ठाण्यात सेवा बजावल्यानंतर त्यांची जालना येथील पोलिस ट्रेनिंग स्कूलमध्ये बदली झाली. २०१४ च्या दरम्यान त्यांच्या पतीला पोटविकाराने ग्रासले. याच काळात त्यांची औरंगाबाद ग्रामीण पोलिस दलात बदली झाली. महिला छेडछाड विरोधी पथक आणि देवगाव रंगारी पोलिस ठाण्याच्या प्रभारी अधिकारी म्हणून त्या रुजू झाल्या. पोटविकाराने एप्रिल २०१७ मध्ये त्यांच्या पतींचे आजाराने निधन झाले. या आघातामुळे राजश्री आडे काही काळ खचून गेल्या, पण कर्तव्य, मुलीचा सांभाळ करण्याची जबाबदारी त्यांच्यावर होती. त्यामुळे त्या नव्या उमेदीने उभ्या राहिल्या. देवगाव रंगारी पोलिस ठाण्याचा पदभार त्यांनी सक्षमपणे सांभाळला. जांभाळा येथील अवैधरित्या सुरू असलेला मांस कारखाना उघडकीस आणला. अवैधरीत्या नेले जाणारे १४ टन मांस पकडून त्यांनी उल्लेखनीय कामगिरी बजावली. नोकरीतील आव्हाने लिलया पेलणाऱ्या राजश्री आडे यांच्याकडे बेगमपुरा पोलिस ठाण्याच्या निरीक्षकपदाचा पदभार आला. एकत्र कुटुंब पद्धतीचा त्या पुरस्कार करतात. आडे कुटुंबात सासू, दीर, जाऊ यांच्यासह सात सदस्य आहेत. मुलगी जिविदा आठवीत शिकते. आयुष्यात कोणतेही संकट आले तरी डगमगयाचे नाही. त्याला सामोरे जायचे. मेहनत आणि सकारात्मक दृष्टिकोन अंगी बाळगला की यश हमखास मिळतेच, असा संदेश राजश्री आडे देतात.