शहरालगत असलेल्या आझाद चौक या उपनगरातील वैद्यकीय अधिकाऱ्याच्या घरी चोरट्यांनी जबरी चोरी करून तब्बल नऊ लाखांचा मुद्देमाल लंपास केला. काही महिन्यांपूर्वी याच परिसरातील एक एटीएम फोडून चोरट्यांनी मोठी रोकड लांबविली होती. या चोरीमुळे शहरात खळबळ उडाली आहे.
घुलेवाडी ग्रामीण रुग्णालयाचे वैद्यकीय अधिकारी संदीप कचोरीया यांच्या घरी चोरीची ही घटना घडली असून चोरट्यांनी स्वयंपाक घराच्या खिडकीचे ग्रील कापून आत प्रवेश केला. या वेळी डॉ. कचोरीया बेडरुममध्ये झोपलेले असताना बेडरुमला बाहेरून कडी लावून घेत चोरी केली. या वेळी डॉ. कचोरीया यांच्या पत्नी तळेगाव दिघे येथे बीव्हीजी कंपनीच्या रुग्णवाहिकेसाठी वैद्यकीय अधिकारी म्हणून ड्युटीवर होत्या. मध्यरात्री अडीचच्या सुमारास डॉक्टरांचा मुलगा पाणी पिण्यासाठी उठला होता. त्यानंतर पहाटे साडेपाच वाजता डॉक्टर नेहमीप्रमाणे उठले असता त्याना बेडरुमचा दरवाजा बाहेरून बंद केल्याचे आढळले.
त्यांनी याची माहिती शेजारी राहणाऱ्या मित्राला देऊन मदतीसाठी बोलावले असता मित्राला गेटचे मुख्य प्रवेशद्वाराचे कुलूप तोडल्याचे आढळले. तसेच दक्षिणेकडील दरवाजा उघडा आढळला. त्याने डॉक्टरांच्या बेडरुमचा दरवाजा उघडून त्यांना बाहेर काढल्यानंतर घरात चोरी झाल्याचे त्यांच्या निदर्शनास आले. पत्नी ड्युटीवरून परतलल्यानंतर घरातील चोरी गेलेल्या वस्तूंचे मोजमाप केल्यानंतर त्यांनी पोलिस ठाण्यात फिर्याद दिली. त्यात २ लाख ३९ हजार ४०० रुपयांची रोकड, २ लाख २० हजार १३९ रुपये किमतीच्या सोन्याच्या बांगड्या, ७८ हजार ५४ रुपये किमतीचे ब्रेसलेट, ३९ हजार ३६७ रुपयांच्या दोन सोन्याच्या जेन्ट्स अंगठ्या, ९७ हजार १३६ रुपयांच्या सात सोन्याच्या लेडीज अंगठ्या, १४ हजार रुपयांच्या कानातील सोन्याच्या ५ बाळ्या, दोन बुगड्या व नाकातील मुरण्या, २५ हजारांचे सोन्याचे तीन पेंन्डल, ९ हजार रुपयांची सोन्याची चेन, ५१ हजार रुपयांचे सोन्याच्या कर्णफुलांचे पाच जोड, ४ हजार रुपयांचे चांदीचे दोन ब्रेसलेट, ३० हजार रुपयांची दुचाकी, ४० हजारांची स्कूटर आणि २३ हजारांची तीन मनगटी घड्याळे असा एकूण आठ लाख सत्तर हजार रुपयांचा मुद्देमाल चोरीस गेल्याचे म्हटले आहे.