बनावट हॉलतिकीट तयार करून बारावीची परीक्षा देण्यासाठी वाशीतील फादर अॅग्नेल शाळेमध्ये गेलेल्या एका विद्यार्थिनीला पकडण्यात आल्याची घटना उघडकीस आली आहे. वाशी पोलिसांनी या विद्यार्थिनीविरोधात बनावट कागदपत्रे तयार केल्याबाबत तसेच परीक्षा अधिनियमानुसार गुन्हा दाखल करून या प्रकरणाचा तपास सुरू केला आहे.
या विद्यार्थिनीने आपल्या आईला बारावीची परीक्षा देत असल्याचे खोटे सांगितले होते. त्यामुळे आपल्या आईला दाखवण्यासाठी तिने मित्राचे हॉलतिकीट घेऊन त्यावरून आपल्या नावाचे हुबेहुब हॉलतिकीट तयार केले. परीक्षेचा पहिलाच दिवस असल्याने तिची आई तिला सोडण्यासाठी थेट परीक्षा केंद्रापर्यंत आली. परिणामी तिला परीक्षा केंद्रात जाऊन बसावे लागले. त्याच वेळेस त्या जागेवरील विद्यार्थी तिथे आला असता या विद्यार्थिनीचे बिंग फुटले.
या घटनेतील विद्यार्थिनी मुंबईतील टिळकनगरमध्ये आईसह मामाच्या घरी राहण्यास असून ती १७ नंबरचा फॉर्म भरून दहावीची परीक्षा पास झाली आहे. त्यानंतर ती नवी मुंबईतील एका कॉलेजमध्ये पुढील शिक्षण घेत होती. मात्र ती अकरावीमध्ये नापास झाल्याने तिने याबाबतची माहिती आपल्या आईला सांगितली नव्हती. दुसरीकडे तिने बाहेरून बारावीची परीक्षा देण्याची तयारी सुरू केली होती. मात्र ती अकरावी नापास असल्याने तिला बाहेरून बारावीची परीक्षा देणे शक्य झाले नाही.
परंतु आई व इतर नातेवाईकांना बारावीच्या परीक्षेला बसल्याचे खोटे सांगितल्याने आपली चोरी पकडली जाऊ नये, यासाठी तिने आपल्या मित्राचे हॉलतिकीट घेऊन त्यासारखेच आपल्या नावाचे हुबेहुब हॉलतिकीट तयार करून ते घरच्यांना दाखवले.
बुधवारी बारावीच्या परीक्षेचा पहिलाच दिवस असल्याने ही विद्यार्थिनी परीक्षेला जाण्याचा बहाणा करून घराबाहेर पडली. मात्र तिची आई तिला परीक्षा केंद्रावर सोडण्यासाठी तिच्यासोबत निघाली. त्यामुळे या विद्यार्थिनीला नाईलाजास्तव बनावटरित्या तयार केलेल्या हॉलतिकिटावर नमूद असलेल्या परीक्षा केंद्रावर जाणे भाग पडले. त्यानुसार ही विद्यार्थिनी आईसह वाशीतील फादर अॅग्नेल शाळेपर्यंत आली. नंतर ती परीक्षा केंद्रातील एका वर्गात जाऊन बसली. मात्र त्याचवेळी त्या जागेवरील मूळ विद्यार्थी आपल्या जागेवर बसण्यासाठी तेथे आल्यानंतर दोन्ही विद्यार्थ्यांचे हॉल तिकीट तपासले गेले. विद्यार्थिनीकडे असलेले हॉलतिकीट बनावट असल्याचे पर्यवेक्षकांना आढळून आल्यावर त्यांनी तिला चौकशीसाठी ताब्यात घेतले.
या घटनेनंतर परीक्षा केंद्रावरील शिक्षकांनी याबाबतची माहिती तत्काळ वाशी पोलिसांना दिली. त्यानुसार वाशी पोलिसांनी या प्रकरणातील विद्यार्थिनीवर बनावट हॉलतिकीट बनविणे, तसेच परीक्षा अधिनियम आदी कलमानुसार गुन्हा दाखल केला आहे. या प्रकरणातील विद्यार्थिनी ही अल्पवयीन असल्याने तिला अटक करण्यात आली नसल्याचे पोलिसांनी सांगितले. मात्र या विद्यार्थिनीने हॉलतिकीट कसे तयार केले, याबाबत पोलिसांकडून अधिक तपास करण्यात येत आहे. तिला चौकशीसाठी गुरुवारी पोलिस ठाण्याला बोलविण्यात आल्याची माहिती पोलिसांनी दिली.