महिलांना रेशन दुकानांवर सॅनिटरी नॅपकिन विनामूल्य देण्याचा निर्णय अखेर राज्य सरकारने घेतला आहे. कर्करुग्ण, अपंग तसेच आर्थिक दुर्बल गटातील महिलांना विनामूल्य सॅनिटरी नॅपकिन दिले जाणार असून इतर महिलांना अल्पदरात नॅपकिन उपलब्ध करून दिले जाणार आहेत. मुख्यमंत्र्यांनी दिलेल्या या आश्वासनानंतर सामाजिक कार्यकर्त्या छाया काकडे यांनी आपले गुरुवारी आपले उपोषण मागे घेतले आहे.
रेशन दुकानांवर सॅनिटरी नॅपकिन विनामूल्य देण्याच्या मागणीसाठी छाया काकडे यांनी मागील आठ दिवसांपासून आझाद मैदानात उपोषण सुरू केले होते. काकडे यांची गुरूवारी प्रकृती बिघडल्याने त्यांना जी. टी. रुग्णालयात दाखल करण्यात आले व उपोषण मागे घेण्यासाठी दबाव आणण्यात आला. मात्र काकडे यांनी नकार देत पुन्हा आझाद मैदानात येऊन उपोषण सुरू ठेवले. गुरुवारी दुपारी त्यांना मुख्यमंत्री कार्यालयातून बोलावणे आले. मुख्यमंत्री देवेंद्र फडणवीस यांनी काकडे यांच्या आंदोलनाचे कौतुक करत रेशन दुकानावर विनामूल्य सॅनिटरी नॅपकिन उपलब्ध करून देण्याची मागणी मान्य केली. महिला व बालविकास मंत्री पंकजा मुंडे याही यावेळी उपस्थित होत्या.
राज्यातील इतर महिलांना नॅपकिन उपलब्ध करून देण्यासाठी राज्य सरकार सर्वेक्षण करणार आहे. तसेच राज्यातील सर्व शाळा आणि कॉलेजांमध्ये सॅनिटरी नॅपकिन व्हेडिंग मशिन बसवण्याची मागणीही मुख्यमंत्र्यांनी मान्य केल्याची माहिती काकडे यांनी दिली.