पोटात जंत झाले की केवळ भूक मंदावणे, वजन कमी होण्यासारख्या तक्रारी भेडसावत नाहीत, तर त्यामुळे फुफ्फुसाचेही आजारही होऊ शकतात. त्यामुळे जंत होऊ नयेत यासाठी तातडीने उपचार करायला हवेत, असा सल्ला डॉक्टरांनी दिला आहे.
पूर्वी लहान मुलांच्या पोटात जंत होऊ नयेत, यासाठी घरगुती औषधे दिली जात. आता प्रभावी औषधे निघाली असली तरीही पुरेशी माहिती नसल्याने ती मुलांना दिली जात नाहीत. जंक फूडचा शरीरावर होणारा मारा, खालावलेली रोगप्रतिकारशक्ती, पालेभाज्या, फळांवर मारलेली काट यामुळे लहान मुलांपासून मोठ्या व्यक्तींमध्येही जंत होण्याचे प्रमाण वाढले आहे. स्वच्छतेच्या सवयी चांगल्या नसतील तर हातावाटे जंतू सर्वप्रथम शरीरात शिरकाव करतात. ज्यांना अनवाणी चालण्याची सवय असते, त्यांच्या पायाच्या भेगांमधून शरीरामध्ये जंतू जाण्याची शक्यता डॉक्टर वर्तवतात.
मोठ्या आकाराचे जंत पोटाच्या आतड्यांमध्ये राहून तिथे एका विशिष्ट प्रकारचा गोळा तयार करतात. पोटात दुखणे, मळमळणे यांसारखा त्रास त्यामुळे होऊ शकतो. काही प्रकारचे जंत उलट्या बाजूने शरीरात फुफ्फुसांत जातात. तिथे राहिल्याने श्वसनमार्गाचे विविध प्रकारचे त्रास वाढवतात, लहान मुलांना सहा महिन्यांतून एकदा जंतांचे औषध द्यायला हवे, असा आग्रह बालरोगतज्ज्ञ डॉ.संदीप केळकर यांनी व्यक्त केला.