शहरवासीय आणि खगोलप्रेमींसाठी एक आनंदाची बातमी. तब्बल दीडशेवर्षांनंतर उद्या बुधवारी (३१ जानेवारी) पौर्णिमेच्या दिवशी तुम्हाला ‘रेड ब्लड सुपर ब्लू मून’ पाहण्याची संधी मिळणार आहे, अशी माहिती ‘एमजीएम’च्या एपीजे अब्दुल कलाम खगोल अंतराळ व विज्ञान केंद्राचे संचालक श्रीनिवास औंधकर यांनी दिली. यापूर्वी अशी खगोलीय घटना १८६६ मध्ये घडली होती.
औंधकर म्हणाले, ‘पश्चिम आकाशात सूर्यास्त झाल्यावर पूर्व आकाशात चंद्र उगवेल. औरंगाबाद येथे सायंकाळी चंद्र उदय सहा वाजून १६ मिनिटांनी पहायला मिळेल. यावेळेस चंद्र खग्रास स्थितीमध्ये उगवणार असून, पूर्व क्षितिजाजवळ दाट वातावरण असल्याने सुरुवातीचे २० ते २२ मिनिट क्षितिजापासून दहा ते बारा अंशापर्यंत चंद्र पहायला मिळणार नाही. ३१ जानेवारी २०१८ रोजी चंद्र- पृथ्वी अंतर तीन लाख ६० हजार ९८५ किलोमीटरवर असणार आहे, यावेळेस चंद्रबिंब १४ टक्के मोठा दिसणार आहे. चंद्र पृथ्वीच्या दाट छायेत असताना पूर्व आकाशात उगवत असल्याने महाचंद्र तांबूस (रेड सूपर मून) आकाराने मोठा दिसणार आहे. भारतीय प्रमाण वेळेनुसार चंद्राचा पृथ्वीच्या विरळ छायेत प्रवेश सायंकाळी चार वाजून १९ मिनिटे व २२ सेकंदांनी होईल. त्यानंतरचंद्राचा पृथ्वीच्या दाट छायेत प्रवेश झाल्यानंतर सहा वाजून २१ मिनिटे व ४७ सेकंदाने खग्रास चंद्रग्रहणाला सुरुवात होईल. सहा वाजून ५९ मिनिट व ५१ सेकंदाला खग्रास मध्यग्रहण व सात वाजून ३७ मिनिट व ५१ सेकंद या वेळेला खग्रास चंद्रग्रहण समाप्त होईल.’
छायाचित्र काढण्याची संधी
‘सध्या हिवाळ्याचे दिवस असून सायंकाळी थंडीही भरपूर आहे. बुधवारी ‘रेड ब्लड सुपर ब्लू मून’ची छायाचित्रे काढणे शक्य होणार असून अंगणात, टेरेसवर अथवा गावाबाहेरच्या शेतमळ्यातून चंद्राची छबी टिपता येणार आहे. एमजीएम परिसरातील एपीजे अब्दुल कलाम खगोल अंतराळ व विज्ञान केंद्रात सायंकाळी साडेसहा वाजता ‘रेड ब्लड सुपर ब्ल्यू मून’ दुर्बिणीतून पाहण्याची सोय उपलब्ध करून देण्यात आली आहे, असे औंधकर म्हणाले.