संजय लीला भन्साळी दिग्दर्शित ‘पद्मावत’ सिनेमा आज प्रदर्शित होत असल्याच्या पार्श्वभूमीवर देशभरात ‘पद्मावत’ विरोधात हिंसक आंदोलन होत आहेत. त्यामुळे खबरदारीचा उपाय म्हणून दिल्ली, नोएडा, गाजियाबाद आणि फरिदाबादमध्ये हाय अॅलर्ट जारी करण्यात आला आहे. तर राजधानी दिल्लीत थिएटरबाहेर रॅपिड अॅक्शन फोर्सचे जवान तैनात करण्यात आले आहेत. गुरुग्राममध्ये स्कूल बसेसना टार्गेट करण्यात आल्याने शाळा बंद ठेवण्यात आल्या असून शहरात संचारबंदी लागू करण्यात आली आहे.
हिंदी, तामिळ आणि तेलगू भाषेमध्ये प्रदर्शित होणारा भन्साळींचा ‘पद्मावत’ देशभरातील ४५०० स्क्रिनवर दाखविण्यात येणार आहे. मात्र करणी सेनेच्या विरोधामुळे गुजरात, राजस्थान, मध्यप्रदेश आणि गोवा येथील थिएटर मालकांनी आज ‘पद्मावत’ प्रदर्शित न करण्याचा निर्णय घेतला आहे. ही चार राज्य वगळता देशातील इतर भागात ‘पद्मावत’ प्रदर्शित होत असल्याने करणी सेनेने आज देशव्यापी बंद पुकारला असून त्याचे देशातील काही भागात हिंसक पडसाद उमटत आहेत.
उत्तर प्रदेशातील गाजियाबादमध्ये ‘पद्मावत’च्या विरोधात काही आंदोलकांनी बसेस फोडल्या आहेत. मध्यरात्री येथील कडकड मॉडल गावात एका बसला आग लावण्यात आली असून याप्रकरणी ८ लोकांना ताब्यात घेण्यात आलं आहे. गुरुग्राममध्येही जी. डी. गोयंका शाळेच्या बसवर ६० आंदोलकांनी हल्ला केला. सुदैवाने या हल्ल्यात २५ मुले बचावली. काँग्रेसचे अध्यक्ष राहुल गांधी यांनीही या हल्ल्याचा निषेध नोंदविला आहे. तर हिंसक घटनांच्या पार्श्वभूमीवर नोएडा आणि गुरुग्राममध्ये रविवारपर्यंत शाळा बंद ठेवण्यात येणार आहेत.