टीआरपी मिळवण्यासाठी सनसनाटी बातम्या देण्याचा ‘खेळ’ एका हिंदी वृत्तवाहिनीला महागात पडला आहे. उपराष्ट्रपती हमीद अन्सारी यांच्याबद्दल चुकीचे वृत्त देणाऱ्या या वृत्तवाहिनीला केंद्र सरकारने जोरदार तंबी दिली आहे. सरकारच्या तंबीनंतर वृत्तवाहिनीनंही आपली चूक मान्य केली असून भविष्यात सावधगिरी बाळण्याची ग्वाही दिली आहे.
प्रजासत्ताक दिनाच्या कार्यक्रमात हमीद अन्सारी यांनी राष्ट्रध्वजाला सलामी दिली नसल्याचं वृत्त एका वृत्तवाहिनीनं दिलं होतं. ‘हमीद अन्सारी जवाब दो’ अशा मथळ्याचा कार्यक्रम दोनवेळा सादर करून उपराष्ट्रपतींना काही प्रश्न विचारले होते. माहिती व प्रसारण मंत्रालयाकडं याबाबतची तक्रार येताच या वृत्तात केल्या जाणाऱ्या आरोपांची शहानिशा करण्यात आली. त्यातून अन्सारी यांनी राष्ट्रध्वजाला सलामी दिल्याचे समोर आले. लगेचच माहिती व प्रसारण खात्यानं संबंधित वृत्तवाहिनीच्या व्यवस्थापनाला याविषयी समज दिली. वृत्तवाहिनीच्या प्रतिनिधींनीही चूक मान्य करत विषयावर पडदा टाकला.