दहा हजार रुपये बिल कसे भरायचे, या भीतीने सीपीआर रुग्णालयातून सोनाबाई रोहिदास राठोड (२५, रा. राजापूर, जि. रत्नागिरी) यांनी आपल्या नवजात मुलाला ठेऊन पलायन केले. दुपारी दोनच्या सुमारास ही घटना घडली. सीपीआर पोलिस चौकीत याप्रकरणाची नोंद करण्यात आली आहे.
सोनाबाई राठोड यांची तीन जानेवारीला सीपीआर रुग्णालयात प्रसुती झाली. बाळाचे वजन एक किलो १६० किलो ग्रॅम असल्याने त्याच्यावर बालरोग विभागात उपचार करण्यात येत होते. या उपचारांचा खर्च सुमारे दहा हजार रुपये होणार असल्याने एवढे बिल कसे भरायचे या भीतीने राठोड यांनी बाळाला ठेऊन रुग्णालयातून पळ काढला.
या संदर्भात बालरोग विभागप्रमुख डॉ. एस. एस. सरवदे म्हणाले, ‘सीपीआरमध्ये प्रसुती मोफत केली जाते. त्यामुळे डिसचार्जच्यावेळी उपचारांचा खर्च रद्द करण्यात येणार होता. राठोड यांना चुकीची माहिती मिळाल्याने त्या बाळाला ठेऊन गेल्या असाव्यात.’ सोनाबाई राठोड यांचा कसून शोध घेत आहोत, अशी माहिती पोलिसांनी दिली.