मुंबई पोलिस आणि प्रामुख्याने क्राइम ब्रँचची अंडरवर्ल्डवर दहशत असल्याचे म्हटले जाते. पण, क्रॉफर्ड मार्केट येथील पोलिस मुख्यालयातील क्राइम ब्रँचच्या इमारतीजवळील माडाच्या झाडावरून टपाटप पडणाऱ्या नारळांची चांगलीच दहशत निर्माण झाली आहे. दररोज नारळ पडण्याचा सिलसिला सुरू असून शुक्रवारी सकाळी अर्धा डझन नारळ पडले. त्यात कपाळमोक्ष होताहोता दोन महिला कर्मचारी वाचल्याचेही सांगितले जाते.
क्रॉफर्ड मार्केट येथील मुंबई पोलिस मुख्यालयात क्राइम ब्रँचची दगडी इमारत आहे. ही इमारत अनेक गुन्हे उघडकीस आणण्यापासून वेगवेगळ्या नाट्यमय घटनांची साक्ष आहे. अंडरवर्ल्डच्या कारवायांवर नजर ठेवणाऱ्या इमारतीभोवती नारळांसह काही झाडे आहेत. त्यातील या दोन्ही नारळांच्या झाडांना भरपूर नारळ लागले आहेत.
नारळ वेळेत न काढल्याने जमिनीवर कोसळत असून त्यामुळे येणाऱ्या-जाणाऱ्यांना धोका निर्माण झाला आहे. शुक्रवारी अशा नारळांच्या हल्ल्यांपासून दोन महिला कर्मचारी बालमबाल बचावल्या आहेत. अशा नारळांच्या पडझडीने सावध झालेले कर्मचारी, अधिकारी इथून जाताना जपून पावले टाकत आहेत. तिथले कर्मचारीही येजा करणाऱ्यांना सावध करत आहेत.