दलित नेता आणि गुजरातचा आमदार जिग्नेश मेवाणी आणि जेएनयूचा विद्यार्थी नेता खालिद उमर यांच्या एल्गार परिषदेमुळे निर्माण झालेल्या वादाच्या पार्श्वभूमीवर शनिवारवाड्यावर खासगी कार्यक्रमांना बंदी घालण्याचा निर्णय पुणे महापालिकेने घेतला आहे. केवळ महापालिका आणि शासकीय कार्यक्रमांनाच शनिवारवाड्यावर कार्यक्रम घेण्यास परवानगी असेल, असं पुणे महापालिकेनं स्पष्ट केलं आहे.
पुणे महापालिकेने वर्तमानपत्रांमध्ये जाहिराती देऊन शनिवारवाड्यावर खासगी कार्यक्रमांना बंदी घातली असल्याचं जाहीर केलं आहे. सध्या अडीच हजार रुपयांमध्ये शनिवारवाडा कोणत्याही कार्यक्रमासाठी भाड्याने मिळतो. मात्र वाड्याबाहेर पार्किंगची सोय नसल्यामुळे होणारी वाहतूक कोंडी, कार्यक्रमांच्या वेळी होणारी अस्वच्छता, पर्यटकांची गैरसोय यामुळे हा निर्णय घेतल्याचं प्रशासनाच म्हणणं आहे.
शनिवारवाड्याच्या जवळच लालमहाल, नानावाडा, कसबापेठ गणपती मंदिर आदी ऐतिहासिक वास्तूंसह नवग्रह शनी मंदिर आणि दगडूशेठ हलवाई गणपती मंदिर आदी धार्मिक स्थळेही आहेत. शिवाय शनिवारवाडा परिसरात मोठ्या प्रमाणावर व्यापाऱ्यांची दुकानेही आहेत. त्यामुळे हा परिसर ग्राहक आणि पर्यटकांनी गजबजलेला असतो. परिणामी शिवाजी रोड आणि बाजीराव रोडवर मोठ्या प्रमाणावर वाहतुकीची कोंडी होते. त्यामुळे नागरिकांच्या सुरक्षिततेसाठी यापुढे शनिवारवाड्यावर केवळ पालिकेचे आणि शासकीय कार्यक्रमच पार पडतील असं पालिकेने म्हटलं आहे. प्रशासनाचा हा निर्णय महापालिकेच्या सर्वसाधारण सभेत किंवा पक्ष नेत्यांच्या बैठकीत मान्य व्हावा लागेल. सत्ताधारी भाजप या निर्णयाच्या बाजूने असल्याचं सूत्रांनी सांगितलं.