मालाड येथे राहणाऱ्या ४५ वर्षीय सायरा (नाव बदलले आहे ) यांना मागील सहा महिन्यांपासून असह्य पोटदुखीचा त्रास होत होता. वेगवेगळ्या प्रकारचे उपचार करूनही त्यांना गुण आला नाही. अखेरीस त्यांनी शताब्दी रुग्णालयामध्ये उपचार सुरू केले. सायरा यांच्या पोटातून तब्बल पंधरा किलो वजनाचा गोळा बाहेर काढण्यात आला. हे उपचार वेळीच केल्यामुळे त्यांच्या जीवावरचा धोका टळल्याचे ही शस्त्रक्रिया करणाऱ्या डॉक्टरांच्या पथकाने सांगितले. स्त्रीरोगतज्ज्ञ डॉ. जयंत चीलकुंड, डॉ. वनश्री बहादे, डॉ. दीपक होलकर, परिचारिका रूपाली गोरड यांच्या चमूने ही क्लिष्ट शस्त्रक्रिया केल्यामुळे सायरा यांना जीवनदान मिळाले आहे.
१८ डिसेंबर रोजी सायरा पहिल्यांदा शताब्दी रुग्णालयाच्या ओपीडीमध्ये सोनोग्राफी रिपोर्ट घेऊन आल्या होत्या. या रिपोर्टमध्ये त्यांच्या पोटात खूप मोठा गोळा दिसत होता. रुग्णालयातील स्त्रीरोगतज्ज्ञांच्या टीमने त्यांना सीटी स्कॅन करण्यासाठी सांगितले तेव्हा या स्कॅनमध्ये ओव्हेरिअन सिस्ट असल्याचे दिसून आले या सिस्टची ३१ बाय २१ सें.मी. होती. रक्तचाचणीमध्येही हा गोळा कॅन्सरचा नसल्याचे निदान झाले होते. तरीही तातडीने हा गोळा बाहेर काढणे गरजेचे होते. डॉक्टरांच्या टीमने प्रयत्नांची पराकाष्ठा करून १५ किलोची ही गाठ बाहेर काढली, त्यासह गर्भाशय व उजव्या बाजूला असणारे अंडाशयही काढावे लागले. पुढील गुंतागुंत टाळण्यासाठी डॉक्टरांना हा निर्णय घ्यावा लागला. सायरा आयसीयूमध्ये सुखरूप असून तिची प्रकृतीही स्थिर आहे.